Móti aflýst

21.08.2009
Það er greinilegt að það er komin smá hauststemning í blakfólk og það farið að hugsa inní hús, því ekki náðist nægileg þátttaka til að halda Opna Gröfutæknimótið sem vera átti um helgina. Því hefur mótinu því miður verið aflýst.

Allir sem vilja spila á Flúðum á morgun ættu samt að drífa sig, því vellirnir voru tættir upp í dag og sandurinn því eins mjúkur og hann getur orðið. Flúðamenn ætla sjálfir að vera á staðnum og tilbúnir að spila.

Opna Gröfutæknimótið verður haldið á laugardaginn

18.08.2009
Á laugardaginn kemur þann 22. ágúst verður haldið strandblakmót á Flúðum, og kallast það Opna Gröfutæknimótið.
Flúðamenn eru með tvo mjög svo góða velli, í frábæru umhverfi á tjaldsvæðinu þar í bæ.

Keppt verður bæði í karla og kvennaflokki í tveggja manna liðum og er skráning þegar hafin hér á strandblak.is.
Þátttökugjald er 3.000 kr, og greiðist það á staðnum.

Vinningarnir eru ekki af verri endanum, en þeir hljóða uppá gistingu á Hótel Flúðum, gistingu á gistiheimilinu Grund og svo pizzuveisla ásamt einhverju fleiru.

Allir þátttakendur fá frítt á tjaldsvæðið þessa helgina.

Nú er um að gera að skrá sig og vera með á þessu síðasta strandblakmóti sumarsins.
Mótið hefst kl 10.00 á laugardaginn.

Skráning er hér Ath að síðasti skráningardagur er föstudagurinn 21. ágúst kl 19.00

Nýir íslandsmeistarar í karlaflokki í strandblaki en konurnar vörðu sinn titil.

15.08.2009
íslandsmótið í strandblaki var spilað í föstudag og laugardag í blíðskapar strandblak-veðri.

Þetta er stærsta íslandsmót sem haldið hefur verið en 22 lið mættu til leiks.
Aldrei hafa áhorfendur heldur verið jafn margir og á þessu móti, og var stöðugur straumur fólks á staðinn.

Styrktaraðilar okkar ( Altis ehf, Kjörís, Marko Merki, Sporthúsið, Ellingsen, Ikea, World Class, Hátækni, Hreyfing, Sambíóin, Dominos, Opin Kerfi, Byko, Örninn, og Útilíf) sáu til þess að mótið varð hið glæsilegasta og tóku þátttakendur undir það.
Kjörísbíllinn var í miklu uppáhaldi hjá öllum viðstöddum sem og hoppikastalinn fyrir börnin. Einnig var gaman að fylgjast með áhorfendum þegar þeir grófu hvað mest þeir máttu eftir fjársjóðum sem faldir voru í sandinum.

Íslandsmótið um helgina var jafnframt síðasta stigamót sumarsins og voru því krýndir stigameistarar ársins 2009.
Í kvennaflokki varð Laufey Björk Sigmundsdóttir (HK) stigameistari, en í karlaflokki urðu það félagarnir Einar Sigurðsson (HK) og Bynjar Pétursson (HK).

Unglingarnir okkar hafa verið duglegir að taka þátt í mótum sumarsins og voru krýndir í fyrsta sinn Íslandsmeistarar í flokki unglinga. Í stúlknaflokki varð þar Birta Björnsdóttir (HK) sem varð stigameistari, og þar með Íslandsmeistari, en í drengjaflokki urðu það Ólafur J Júlíusson (HK) og Ingólfur Guðjónsson (HK) sem urðu stiga- og Íslandsmeistarar.

Til úrslita í kvennaflokki lentu liðin sem eru búin að kljást í allt sumar, en það voru titilverjendurnir Lilja og Laufey sem spiluðu á móti Heiðbjörtu og Þóreyju.

Ekki þarf að fara mörgum orðum um þennan leik því þær Lilja og Laufey hreinlega kaffærðu andstæðingana með mjög svo þéttum og góðum uppgjöfum, ásamt því að setja boltann oftar á þá staði sem andstæðingarnir voru ekki fyrir.

Þær Lilja og Laufey urðu því Íslandsmeistarar 2009 með því að sigra úrslitaleikinn 2-0, en hrinurnar fóru 21-11 og 21-9.

Í karlaflokki spiluðu í undanúrslitum þeir Einar Sigurðsson (HK) og Brynjar Pétursson (HK) á móti Michael Overhage (Þrótti) og Vali Guðjóni Valssyni (Þrótti). Áður höfðu þessi lið mæst í mótinu og sigruðu þeir Michael og Valur Guðjón 2-0.

Michael og Valur Guðjón lentu á móti þeim Karli Sigurðssyni (HK) og Emil Gunnarssyni (HK) í 3. leik. Þetta var hörku leikur og mikil spenna og hiti í mönnum. Michael og Valur Guðjón sigruðu 1. hrinuna sannfærandi 21-11. Þeir Karl og Emil neituðu að gefast upp svo auðveldlega og sigruðu aðra hrinu 21-18. í úrslitahrinunni voru það svo Karl og Emil sem voru alltaf skrefi á undan og sigruðu hana eftir 53 mínútna leik 15-12, og voru þar með komnir í úrslitaleikinn.

Þetta varð til þess að Michael og Valur Guðjón þurftu að spila undanúrslitaleik við þá Einar og Brynjar.

Sá leikur varð ekki síður spennandi. Einar og Brynjar sigruðu fyrstu hrinuna 15-21. Michael og Valur Guðjón þá næstu 21-19. Í oddahrinunni voru það svo þeir Micahel og Valur Guðjón sem höfðu taugarnar í lagi og sigruðu hana 15-10, og þar með leikinn 2-1.

Liðin sem áttu því að spila til úrslita voru Karl og Emil gegn Michael og Vali Guðjóni. Þá kom upp hið furðulegasta mál. Valur Guðjón tók þá ákvörðun að gefa úrslitaleikinn þar sem hann var á leið í brúðkaup og varð því ekki um neinn hreinan úrslitaleik að ræða. Karli og Emil varð því dæmdur sigur í úrslitaleiknum 2-0, og hrinurnar 21-0 og 21-0.

Karl og Emil eru því Íslandsmeistarar karla 2009.

Úrslit helgarinnar urðu því eftirfarandi.

Íslandsmeistarar kvenna 2009.

1. sæti Laufey Björk Sigmundsdóttir og Lilja Jónsdóttir (HK)
2. sæti Heiðbjört Gylfadóttir og Þórey Haraldsdóttir (HK)
3. sæti Fríða Sigurðardóttir og Birna Baldursdóttir

Íslandsmeistarar karla 2009.

1. sæti Karl Sigurðsson og Emil Gunnarsson (HK)
2. sæti Michael Overhage og Valur Guðjón Valsson (Þrótti)
3. sæti Einar Sigurðsson og Brynjar Pétursson (HK)

Íslandsmeistari kvenna 2009 (unglingaflokkur) er Birta Björnsdóttir (HK)
Íslandsmeistarar karla 2009 (unglingaflokkur) eru þeir Ólafur J Júlíusson (HK) og Ingólfur Guðjónsson (HK)

Fyrstu leikirnir búnir og næstu leikir í fyrramálið

14.08.2009 kl. 22:15
Í dag voru spilaðir fyrstu leikirnir í Íslandsmótinu.

Karlariðillinn byrjaði með látum þar sem tvö af sterkustu liðum keppninnar mættust, þeir Einar og Brynjar á móti Micha og Gauja.
Eftir mjög svo jafna baráttu í fyrstu hrinu endaði hún með minnsta mun, 19-21 fyrir Micha og Gauja. Önnur hrinan var jöfn uppað 12 stigum, þá datt botninn úr leik Einars og Brynjars og töpuðu þeir hrinunni 14-21 og þar með leiknum 0-2.

Þetta er nokkuð óvenjuleg staða fyrir þá félaga þar sem þeir hafa verið á toppnum í íþróttinni undanfarin ár, og verður fróðlegt að sjá hvort þessi lið endi á móti hvort öðru í úrslitum, það gæti orðið hörku rimma.

Í kvennadeildina mættu tvö lið sem ekki hafa spilað í sumar en eru gamlir reynsluboltar. Þær Ingibjörg og Birna Halls annars vegar, og svo Fríða og Birna Baldurs hinsvegar. Bæði liðin sigruðu sína leiki í dag.

Á morgun heldur mótið áfram og eru fyrstu leikirnir settir inn hér að neðan. Ekki er hægt að setja inn alla leiki dagsins þar sem mótið raðast alveg eftir því hvort lið sigrar eða tapar, en hvert lið má tapa einu sinni áður en það fellur úr leik.

Athygli skal vakin á því fyrir keppendur að eftir mótið er keppendum boðið uppá grill á staðnum. Einnig verður dregið í happadrætti keppenda þar sem veglegir vinningar eru í boði. Eingöngu verður þó dregið úr nöfnum þeirra keppenda sem verða á staðnum eftir úrslitaleikina.

Áhorfendur ættu heldur ekki að víkja af staðnum fyrr en eftir úrslitaleiki því að fjársjóðsleitin ógurlega fer fram milli úrslitaleikja. Þar eiga áhorfendur möguleika á að grafa upp úr sandinum GSM síma, heilsuræktarkort og markt fleira.

Fyrstu leikirnir spilaðir föstudag

14.08.2009 kl. 00:22
Nú er búið að raða þeim leikjum sem verða spilaðir á föstudagskvöldi, og eru þeir eftirfarandi:

Mótið heldur síðan áfram á laugardagsmorgni og raðast liðin á móti hvert öðru eftir frammistöðu þeirra frá föstudeginum, hvort þau hafi unnið þá eða tapað. Spilað er eftir tvöföldu útsláttarkerfi þannig að allir eiga í það minnsta 1 leik á laugardeginum.

Reiknað er með að úrslitaleikirnir verði spilaðir kl 17:30 karlaleikurinn og 18:00 kvennaleikurinn, en mótið stendur allan daginn fram að því.

Mesti fjöldi liða til þessa

13.08.2009 kl. 20:30
Aldrei hafa jafn mörg lið tekið þátt í Íslandsmóti, en 22 lið hafa skráð sig til leiks.

Eins og fyrr eru konur þar í meirihluta eða 14 lið, karlaliðin eru 8.

í þessum töluðu orðum er verið að raða niður leikjunum og verður það komið á vefinn í kvöld. Einhver lið koma til með að leika annað kvöld (föstudagskvöld) og verður hringt í þau lið í kvöld og þau látin vita.

Frábær skráning

12.08.2009
Nú er einn dagur eftir til að skrá liðið sitt en það stefnir allt í að þetta verði allra stærsta Íslandsmót til þessa.

Þar sem svo mörg lið eru þegar búin að skrá sig til leiks þurfum við að spila einhverja leiki á föstudagskvöldinu.
Það kemur í ljós annað kvöld, þegar skráningu lýkur, hvaða lið gætu þurft að mæta á föstudagskvöldið, en haft verður samband við þau lið símleiðis annað kvöld.

Áætlað er að mótið sjálft ljúki kl 18:30 á laugardaginn en úrslitaleikirnir eru settir á kl 17:30 (karlar) og 18:00 (konur).

Meðan á úrslitaleikjunum stendur verður fjársjóðsleit fyrir áhorfendur, þar sem ýmis gull verða grafin í sandinn og áhorfendur leita. Einnig verður happadrætti fyrir keppendur, en eingöngu er dregið úr nöfnum þeirra keppenda sem verða á staðnum þegar úrslitaleikirnir fara fram.

Veitingasala verður á staðnum en einnig verður keppendum boðið uppá grillaða borgara í lok móts.

Íslandsmótið næsta laugardag - Skráning hafin

10.08.2009
Næsta laugardag þann 15. ágúst verður Íslandsmótið í strandblaki haldið. Mótið verður haldið á strandblakvöllum HK í Fagralundi og hefst það stundvíslega kl 9.00.

Eftir mótið verða krýndir Íslandsmeistarar karla og kvenna, Íslandsmeistarar unglinga og svo stigameistarar karla og kvenna, en þrjú stigamót hafa verið haldin í sumar og er þetta mót það síðasta á sumrinu sem gefur stig til stigameistara.

Búist er við að þetta verði stærsta Íslandsmót til þessa þar sem fjölmargir hafa verið að sækja strandblakvelli landsins undanfarið til æfinga.

Margt skemmtilegt verður gert meðan úrslitaleikirnir fara fram, Kjörísbíllinn verður á staðnum, fjársjóðsleit fyrir áhorfendur, happdrætti keppenda, grill fyrir keppendur eftir mót og eitthvað fleira.

Tímasetning leikja verður sett hér inn á fimmtudagskvöldið, eftir að skráningu lýkur.
Þátttökugjald á mótinu eru 4.000 kr pr/lið og greiðast þær á staðnum fyrir fyrsta leik.

Skráning er hafin en henni lýkur fimmtudaginn 13. ágúst kl 20.00

Skráðu þitt lið hér

Staðan í stigakeppninni

27.07.2009
Nú þegar hafa 3 mót verið haldin í sumar sem gefa stig til stigameistara. Eitt mót er eftir og er það Íslandsmótið sem haldið verður þann 15. ágúst, en þá kemur í ljós hver verður stigameistari karla og kvenna 2009.

Íslandsmeistarar unglinga verða einnig krýndir á Íslandsmótinu í ágúst og eru það heildar stigin úr stigamótum sumarsins ásamt þeim stigum sem fást á Íslandsmótinu sem skera úr um það hver eða hverjir hljóta þann titil.

Hægt er að skoða stigin hjá hverjum og einum á síðunni "Stigastaða" hér vinstra megin á síðunni.

Úrslit eftir bókinni

26.07.2009
Þriðja stigamót BLÍ sumarið 2009 var spilað í frábæru veðri eins og önnur mót, en við höfum verið sérlega heppin með veður á þeim mótum sem spiluð hafa verið í sumar.

Dagurinn var frábær í alla staði, mótið gekk mjög vel fyrir sig og virtust allir þátttakendur sem og áhorfendur, sem voru mun fleiri en áður, vera mjög ánægð eftir daginn.
Kjörísbíllinn mætti á svæðið og fengu áhorfendur ís að vild. Eftir mótið voru grillin tekin fram og keppendur sem og áhorfendur borðuðu saman, og myndaðist frábær stemning á mótsstað og er óhætt að segja að þessi háttur verður hafður á í komandi mótum.
Ekki voru þeir síður ánægðir Jason Ívarson formaður Blaksambands Íslands og Sævar Guðmundsson framkvæmdarstjóri Blaksambandsins, en þeir kíktu við til að leggja blessun sína á mótið. Myndin hér til hægri er einmit af þeim herramönnum.

Úrslit mótsins voru eftir bókinni ef svo má segja þar sem landsliðin, bæði karla og kvenna, unnu sína flokka.

Í úrslitum í kvennaflokki spiluðu núverandi Íslandsmeistarar Lilja og Laufey á móti Landsmótsmeisturunum Heiðu og Þóreyju. Lilja og Laufey komu mun ákveðnari til leiks eftir að hafa tapað fyrir þeim Heiðu og Þóreyju fyrr um daginn. Fyrri hrinan var allan tíman þeirra Lilju og Laufeyjar og unnu þær hana 21-15. Seinni hrinan var mun jafnari en fór þó svo að lokum að þær Lilja og Laufey sigruðu þá hrinu einnig 21-18, og þar með leikinn 2-0.

Í karlaflokki mættust núverandi Íslandsmeistarar Einar og Brynjar á móti Landsmótsmeisturunum Karli og Emil. Þessi lið höfðu mæst fyrr um daginn í leik sem fór í oddahrinu, en í úrslitaleiknum var aldrei spurning hver færi með sigur af hólmi. Einar og Brynjar sigruðu fyrri hrinuna 21-16 en þá seinni 21-12, og þar með leikinn 2-0.

Efstu þrjú sætin urðu því þannig:

Karlar:
1. sæti Einar Sigurðsson og Brynjar Júlíus Pétursson (HK)
2. sæti Karl Sigurðsson og Emil Gunnarsson (HK)
3. sæti Ingólfur Hilmar Guðjónsson og Ólafur Jóhann Júlíusson (HK)

Frá vinstri: Emil, Kalli, Brynjar, Einar, Óli J og Ingó.

Konur:
1. sæti Laufey Björk Sigmundsdóttir og Lilja Jónsdóttir (HK)
2. sæti Heiðbjört Gylfadóttir og Þórey Haraldsdóttir (HK)
3. sæti Kolbrún Júlía Erlendsdóttir og Ásta Sigrún Gylfadóttir (HK)

Frá vinstri: Heiða, Þórey, Laufey, Lilja, Kolla og Ásta

Eins og sjá má ber HK ennþá höfuð og herðar yfir önnur íþróttafélög í strandblaki, en því má einna helst þakka að HK var fyrsta liðið sem fékk strandblakvelli til umráða.
Ekki er þó víst að HK verði lengi eitt á toppnum þar sem fleiri félög hafa verið að fá velli að undanförnu, eins og Hrunamenn á Flúðum, Egilsstaðabúar, Mosfellingar og fleiri.
Einnig hafa þó nokkur lið víða um landið fengið til sín þjálfara frá HK til að kenna þeim íþróttina og verður þess ekki langt að bíða að önnur félög komist í verðlaunasæti.

Næsta stórmót er svo Íslandsmótið sem haldið verður þann 15. ágúst í Fagralundi, en búast má við að þá verði slegin öll met í fjölda þátttakenda, þar sem mikil vakning hefur orðið í íþróttinni í sumar.

Önnur mót á dagskrá eru trimmót í Neskaupsstað um verslunarmannahelgina og svo Opna Gröfutæknimótið á Flúðum þann 22. ágúst. Nánar um mótin má lesa inná síðunni Mót, þar sem talin eru upp strandblakmót sumarsins.

Strandblak.is þakkar keppendum og áhorfendum fyrir skemmtilegan og vel heppnaðan dag.

Bætt aðstaða - grill og kökur eftir mót

24.07.2009
Aðstaðan í Fagralundi hefur verið bætt frá síðasta móti, en girðing er komin í kringum mest allan völlinn til að varna því að boltarnir þjóti yfir í annað póstnúmer.

Tjald verður á staðnum fyrir veitingar og keppendur ef það byrjar að dropa á mannskapinn.

Veitingar, samlokur, kaffi, Trópí og eitthvað slíkt verða til sölu á staðnum.

Grill og kökur eftir mót!
Við ætlum svo að gera okkur glaðan dag eftir mótið. Við hjá Strandblak.is ætlum að mæta á staðinn með tvö gasgrill og geta keppendur sem og aðrir fengið að setja eigin góðgæti á grillið eftir mót. Einnig hefur heyrst að einhverjar myndar konur ætli að mæta með kökur í eftirrétt, en það er að sjálfsögðu allt frjálst. Ef þú vilt mæta með köku líka þá væri það bara gaman.

Nú er bara að mæta með útilegustólana, teppin, grillmatinn, drykkina og frábæra strandblakskapið, og hafa fjör og gaman allan daginn í góðum félagsskap.

Uppröðun fyrstu leikja fyrir mótið á morgun (25. júlí)

24.07.2009
Það er sérlega ánægjulegt að segja frá því að skráning í 3. stigamót sumarsins slær fyrri met, en 21 lið eru skráð til leiks, 9 karlalið og 12 kvennalið. Það er því ljóst að þetta verður langur laugardagur hjá sumum.

Fyrstu leikir hefjast kl 9.00 hjá konum en kl 10.30 hjá körlum. Öll lið eru minnt á að mæta ekki seinna en hálftíma fyrir auglýstan leiktíma þar sem tímaplan á svona mótum getur breyst hratt.

Hér má sjá uppröðun fyrstu leikja:

Greiðsla keppnisgjalda skal fara fram fyrir fyrsta leik hjá liði.

Stigamót III á laugardaginn - skráning hafin

20.07.2009
Á laugardaginn kemur þann 25. júlí verður III. Stigamót BLÍ haldið í Fagralundi í Kópavogi. Mótið hefst kl 9.00 stundvíslega og eru liðin beðin um að vera mætt tímanlega.

Mikil spenna er meðal strandblakara því ljóst er að ekkert lið er öruggt í efsta sæti, ef miðað er við úrslit Landsmótsins sem fram fór á dögunum.

Mörg ný lið litu dagsins ljós á Landsmótinu og ætla þau sér sér að koma sterk inní mótið á laugardaginn.

Skráning er hafin en lokað verður fyrir skráningu föstudaginn 24. júlí kl 19.00.

Nú er um að gera að vera með, og hvetja þau lið sem ekki hafa enn tekið þátt í sumar að ná sér í smá reynslu fyrir Íslandsmótið sem haldið verður í ágúst.

Þátttökugjald er 3.000 kr pr/lið og greiðist það á staðnum fyrir fyrsta leik.

Skráðu þitt lið hér

Vantar þig strandblakbolta eða sandsokka ?

15.07.2009
Hefur þú áhuga á að eignast alvöru strandblakbolta?
Langar þig að spila strandblak án þess að vera að frjósa á tánum?

Við hjá Strandblak.is höfum ákveðið að taka saman pantanir fyrir boltum og sandsokkum, smelltu þá hér til að fá nánanri upplýsingar.

Úrslit Landsmótsins

13.07.2009
Þá er Landsmóti UMFÍ lokið en það var haldið í vægast sagt frábæru veðri norður á Akureyri frá miðvikudeginum 9. júlí fram á sunnudaginn 12. júlí.

Þótt strandblakið hafi verið sýningargrein á mótinu þá tóku fjölmörg lið þátt í greininni og keppnin alls ekki minni en í öðrum greinum. 16 lið tóku þátt í mótinu, 11 kvennalið og 5 karlalið.

Konurnar spiluðu eftir tvöföldu útsláttarkerfi og fór það svo að í úrslitum mættu þær Laufey Sigmundsdóttir og Lilja Jónsdóttir núverandi Íslandsmeistarar og landslið Íslands í greininni, þeim Heiðbjörtu Gylfadóttur og Þóreyju Haraldsdóttur, en þær mættu til að verja Landsmótsmeistaratitilin síðan 2007.

Fyrr um morguninn höfðu þessi lið mæst, en þar fóru þær Laufey og Lilja með öll völd í leiknum og sigruðu 2-0. Þær Heiða og Þórey fengu eingöngu 15 og 14 stig í hrinunum.

Úrslitaleikurinn var mun jafnari og mikil barátta í gangi. Þær Heiða og Þórey komu ákveðnar til leiks, og eftir mikla baráttu, flottar sóknir og varnir beggja liða fór svo að þær Heiða og Þórey unnu leikinn 2 - 1, og urðu því Landsmótsmeistarar í annað sinn.

Úrslit kvenna urðu þannig:
1. sæti Heiðbjört Gylfadóttir og Þórey Haraldsdóttir (UMSK)
2. sæti Laufey Sigmundsdóttir og Lilja Jónsdóttir (UMSK)
3. sæti Auður Anna Jónsdóttir og Harpa Björnsdóttir (ÍBA)

Karlarnir kepptu aftur á móti í einum 5 liða riðli þar sem allir kepptu við alla. Í úrslitum þar mættu núverandi Íslandsmeistarar og landslið Íslands í greininni, þeir Einar Sigurðsson og Brynjar Péturson, þeim Emil Gunnarssyni og Karli Sigurðssyni sem hafa vermt annað sætið í greininni á síðustu mótum eftir þeim Einari og Brynjari.

Það var greinilegt að þeir Emil og Karl komu mun einbeittari til leiks og sáu þeir Einar og Brynjar aldrei til sólar í leiknum sem lauk með sigri Emils og Karls, 2 - 0.

Úrslitin karla urðu eftirfarandi:
1. sæti Emil Gunnarsson og Karl Sigurðsson (UMSK)
2. sæti Einar Sigurðsson og Brynjar Pétursson (UMSK)
3. sæti Hafsteinn Valdimarsson og Kristján Valdimarsson (HSK)

Frábært var að sjá hve mörg lið tóku þátt og fögnum við sérstaklega þeim liðum af landsbyggðinni sem mættu í mótið, þrátt fyrir litla þekkingu og æfingar í greininni. Það er augljóst að greinin eignast fleiri og fleiri aðdáendur með hverju mótinu og ekki langt að bíða þess að sterk lið komi annarsstaðar frá en Kópavogi, sem hefur verið uppeldisstöð þeirra fremstu í dag.

Hér má sjá myndir af verðlaunahöfum í strandblakinu.

Frá vinstri: Brynjar, Einar, Emil, Karl, Kristján og Valdimar

Frá vinstri: Lilja, Laufey, Þórey, Heiða, Harpa og Auður

Úrslit strandblaksins á Landsmótinu koma í ljós á morgun sunnudag

11.07.2009 kl 23:59
Úrslit karla verða spiluð kl 12:00 á sunnudag en kvenna kl 12:30.

Þeir leikir sem eftir eru í mótinu verða spilaðir á eftirfarandi tíma:

Kl. 10:00 konur (1) Heiða & Þórey (UMSK) - Lilja & Laufey (UMSK)
Kl. 10:30 konur (2) Ásthildur & Jóhanna (ÍBR) - Harpa & Auður (ÍBA)
Kl. 11:00 konur (3) Taplið úr leik 1 - Sigurlið úr leik 2
Kl. 11.30 karlar Valli & Óli A (UMSK) - Hafsteinn & Kristján (HSK), úrslitaleikur um 3. sæti karla.

Kl. 12.00 karlar Emil & Kalli (UMSK) - Einar & Brynjar (UMSK), úrslitaleikur um 1. sæti karla.
Kl. 12.30 konur úrslitaleikur um 1. sæti kvenna, en alveg er óráðið hverjar lenda í úrslitaleiknum, en það kemur í ljós með fystu leikjum í fyrramálið.

Landsmótsmeistarar 2009 kvenna og karla í strandblaki verða því krýndir kl 13.00 við strandblakvöllinn.

Niðurröðun leikja og mótsskipulag

10.07.2009 kl 20:00
Nú er loks búið að raða niður strandblakmótinu. 18 lið skráðu sig til leiks, 11 kvennalið og 7 karlalið.

Spilað verður allan laugardaginn og fram yfir hádegi á sunnudag.

Þar sem við höfum eingöngu 1 völl þá þarf að raða karla og kvennakeppninni til skiptis. Röðunin verður eftirfarandi:

Laugardagur:
Konur frá 10:30 - 15:30
Karlar frá 15:30 - 19:30
Konur frá 19:30 - 22:30 (leik lokið)

Sunnudagur:
Karlar frá 9:00 - 10:30
Konur frá 10:30 - 12:00
Karlar frá 12:00 - 12:30 (Úrslitaleikur karla)
Konur frá 12:30 - 13:00 (Úrslitaleikur kvenna)

Keppt verður eftir tvöföldu útsláttarkerfi og því eingöngu hægt að raða upp liðunum í fyrstu leikina á laugardeginum, en liðin spila á eftirfarandi tímum:
ATH! að tímasetningar eru til viðmiðunar. Sumir leikir eru mun styttri en 30 mín og því gætu leikir hafist fyrr en auglýst er. Fylgist því vel með á völlunum.

Leikjaniðurröðun tilbúin kl 20.00

10.07.2009 kl 19.07
Vegna fjölgunar liða fram á síðustu stundu þá þurfum við örlítið meiri tíma til að raða upp mótinu.

Upplýsingar verða komnar í loftið kl 20.00

Góð skráning í strandblakið á Landsmótinu

10.07.2009
Nú er skráningu í Landsmótið lokið en 9 kvennalið og 7 karlalið skráðu sig til leiks, en þetta þýðir að spila verður bæði laugardag og sunnudag.

Mótið hefst fyrir hádegi á laugardaginn og verður niðurröðun leikja og tímasetningar komnar hér á vefinn fyrir kl 19.00 föstudag.

Landsmót ATH! - Breyting á tímasetningum

08.07.2009
Þar sem fjölmargir hafa beðið okkur um að færa til leiktíma og taka tillit til inniblaksins höfum við ákveðið að verða við þeirri ósk.

Strandblakmótið hefst því ekki fyrr en á laugardagsmorgni, og allir leikir spilaðir á laugardegi og jafnvel einhverjir á sunnudagsmorgni ef skráningin verður meiri en nú er orðið.

Það er slæmt að þurfa að gera þessar breytingar á auglýstum tíma, en við viljum endilega taka tillit til þeirra sem vilja spila bæði inni og úti.

Skráningartíminn hefur því verið lengdur og er síðasti skráningartími fimmtudagskvöldið.

Skráning fer fram hér

Landsmótið nánar - Síðasti skráningardagur

07.07.2009
Við höfum fengið nokkrar fyrirspurnir um það hvort hægt sé að spila bæði í inniblakinu og í strandblakinu.
Hugmyndin er að reyna eftir fremsta megni að raða strandblakinu eftir inniblakinu, en þegar er komin leikjaniðurröðun fyrir inniblakið.
Við viljum þó ekki ábyrgjast það 100% að einhverjir leikir rekist ekki á, því biðjum við alla þá sem eru í inniblakinu og ætla að skrá sig í strandblakið um að senda póst á strandblak(hjá)strandblak.is og láta vita með hvaða liði einstaklingarnir spila í inniblakinu.

Nú er um að gera að skrá sig sem allra fyrst, því skráningu lýkur kl 19.00 í kvöld.

Skráðu þig hér.

Skráning í Landsmótið

05.07.2009
Eftir frábært mót á Þingeyri um helgina er komið að Landsmóti UMFÍ á Akureyri en það verður í gangi dagana 9. - 12. júlí. Strandblakið sjálft verður spilað á föstudegi og laugardegi.

Völlurinn á Akureyri er ný uppgerður, komin meiri sandur og fleira, meira en tilbúin fyrir mótið. Strandblakið hefst föstudagsmorguninn 10. júlí kl 9.00.

Skráning er í fullum gangi og er búist við mjög góðri þátttöku því veðurspá helgarinnar er eins og hún er sem best fyrir strandblak, sól og steikjandi hiti.

Síðasti möguleiki að skrá sig er fyrir kl 19.00 þann 7. júlí.

Skráning fer fram hér

Flott þátttaka á Þingeyri í dag

04.07.2009
Í dag verður II Stigmót BLÍ þetta sumarið og er það haldið á Þingeyri við Dýrafjörð. Mjög góð skráning er í mótið en 15 lið skráðu sig til leiks.

Það er greinilegt að íþróttin er að slá í gegn hjá kvennfólkinu því 11 kvennalið verða að spila á mótinu en eingöngu 4 karlalið.

Mótið hefst á slaginu 9.00

Magnað mót á Flúðum

04.07.2009
Laugardaginn fyrir viku fór fram fyrsta mótið á nýjum völlum Flúðamanna. Það er skemmst frá því að segja að þetta mót sló gjörsamlega í gegn því yfir 70 þátttakendur tóku þátt í mótinu í 22 liðum.

Brakandi sól og hiti bökuðu keppendur allan daginn og þurftu leikmenn að kæla sig í nærliggjandi á.

Keppendur sammæltust um það að þessir nýju vellir séu í hæsta gæðaflokki og verða þeir því notaðir í mótaröðina næsta sumar.

Landsmót UMFÍ á Akureyri

29.06.2009
Strandblak verður að þessu sinni sýningargrein á Landsmóti UMFÍ á Akureyri, sem fer fram dagana 9. - 12. júlí.

Strandblakmótið sjálft fer fram föstudaginn 10. og laugardaginn 11. júlí, þó með fyrirvara um að það lengist fram á sunnudag vegna fjölda liða. Mótið hefst kl 9.00 á föstudeginum með tæknifundi, þar sem skerpt verður á reglum í strandblaki.

Þátttökugjald á Landsmótið eru 6.000 kr á lið en innifalið í því er aðgangur að tjaldsvæðum keppenda, aðgangur að öllum íþróttagreinum, bolur og drykkur. Ætlast er til að þátttökugjöld séu greidd á staðnum fyrir fyrsta leik.

Síðasti möguleiki að skrá sig er fyrir kl 19.00 þann 7. júlí.

Skráning fer fram hér

Skráning í Stigamót II á Þingeyri

28.06.2009
Næsta mót á dagskrá er II. Stigamót BLÍ sem haldið verður á Þingeyri, en þetta er fjórða sumarið sem slíkt mót er haldið á þessum frábæra stað.

Mótið verður haldið laugardaginn 4. júlí og hefst það kl 9.00, mæting í síðasta lagi 8:45.

Þátttökugjald er 3.000 kr á lið og er það greitt á staðnum fyrir fyrsta leik.

Síðasti skráningardagur er fyrir kl 19.00 föstudaginn 3. júlí og fer skráning eingöngu fram hér á Strandblak.is.

Nú er um að gera að vera með í þessu móti til að missa ekki af stigum sem gilda fyrir lokamótið í ágúst.

Smellið hér til að skrá liðið.

Þess má geta að alltaf hefur verið frábær stemning á mótunum á Þingeyri og verður mótið í ár engin undantekning á því. Snilldar tjaldsvæði eru alveg við vellina sem og mjög góð sundlaug, en frítt er í sund fyrir alla keppendur á keppnisdag.

Strandblakið á hraðri uppleið

27.06.2009
Það er greinilega gróska í strandblakinu á Íslandi.
Þessa helgi fer fram eitt stærsta strandblakmót sumarsins á Flúðum, á nýjum völlum Hrunamanna.

Á meðan Hrunamenn og sveitungar nær og miklu fjær skemmta sér á Flúðum eru heimamenn á Þingeyri við Dýrafjörð á námskeiði í strandblaki alla helgina. Kalli Sig og Heiða sem bæði hafa verið viðriðin strandblakið frá því það byrjaði á Íslandi, halda námskeið um helgina fyrir Höfrunga og önnur lið í kring.

Næstu helgi verður svo haldið stigamót BLÍ á Þingeyri og hefst skráning í það nú strax eftir helgi. Einnig hefst skráning í Landsmótið fljótlega eftir helgi þannig að strandblakarar þurfa að hafa sig alla við til að geta tekið þátt í öllum mótum.

Þetta stefnir í stærsta strandblaksumar frá upphafi og fögnum við því innilega.

"Life is a beach" :-)

Frábær skráning í Flúðamótið

26.06.2009
Það er aldeilis frábær skráning í skemmtimótið sem verður á Flúðum á morgun laugardag, en 7 karlalið og 12 kvennalið hafa skráð sig til leiks.

Skráningu lýkur ekki fyrr en kl 11.00 á morgun en eingöngu er skráð á staðnum hér eftir.

Þetta er ein mesta skráning sem við höfum fengið í eitt mót, en það skal tekið fram að þetta er þriggja manna mót og því um eða yfir 60 manns sem verða að hamast í sandinum á morgun.

Við viljum óska Flúðamönnum innilega til hamingju með þessa nýju strandblakvelli og þetta frábæra mót. Áfram Flúðir!

Strandblak á Landsmótinu á Akureyri

24.06.2009
Rétt í þessu vorum við að fá þær frábæru fréttir að keppt verður í Strandblaki á Landsmóti UMFÍ, sem haldið verður á Akureyri dagana 9. - 12. júlí. En nýr sandur var settur í völlinn hjá Akureyringum nú í vikunni.

Skráning í mótið verður opnuð mjög fljótlega, en nánari upplýsingar verður að finna hér á síðunni um leið og þær berast.

Það lítur því út fyrir frábært sumar fyrir strandblakara, skemmtimót á Flúðum núna á laugardaginn, stigamót BLÍ á Þingeyri þann 4. júlí og svo Landsmótið strax í vikunni á eftir. Það er bara allt að gerast.

Opnunarmót á Flúðum - Skemmtimót

19.06.2009
Snillingarnir á Flúðum eru á fullu að setja upp nýja strandblakvelli.
Að því tilefni verður haldið mót á nýju völlunum laugardaginn 27. júní, og hefst það kl 12.00 (á staðartíma).

Mótið verður 3ja manna skemmtimót og keppt bæði í karla og kvennaflokki. Grillin verða á staðnum og gleði- og sumarstemning allan daginn.

Skráning í mótið er hér á Strandblak.is

Við hvetjum alla sem eitthvað hafa komið nálægt strandblaki, sem og aðra að taka þátt í mótinu og sýna Flúðamönnum þannig stuðning við þessar frábæru framkvæmdir.

Þátttökugjald er ekkert í þessu móti sem verður í umsjón Flúðamanna.

Úrslit fyrsta stigamótsins

13.06.2009
Fyrsta stigamót sumarsins var spilað í ekta íslensku veðri, logni, gjólu, rigningu, sól, úrhelli og svo aftur logni og blíðviðri.

Mjög góð þátttaka var í mótinu og sáust margir mjög góðir leikir. Unga fólkið kom sterkt inní mótið þó svo þau hafi ekki náð að vinna þá bestu.

Í kvennaflokki sigruðu þær Laufey Björk Sigmundsdóttir og Lilja Jónsdóttir HK, þær Heiðbjörtu Gylfadóttur og Þóreyju Haraldsdóttur HK í úrslitaleik, 2 - 0.

Í karlaflokki sigruðu þeir Einar Sigurðsson og Brynjar Pétursson HK, þá Karl Sigurðsson og Emil Gunnarsson HK 2 - 0 í úrlitaleiknum.

Sætaskipan í kvennaflokki varð eftirfarandi:

1. Sæti - Laufey Björk Sigmundsdóttir og Lilja Jónsdóttir (HK)
2. Sæti - Heiðbjört Gylfadóttir og Þórey Haraldsdóttir (HK)
3. Sæti - Inga Lilly Brynjólfsdóttir og Dögg Mósesdóttir (HK)
4. Sæti - Birta Björnsdóttir og María Gunnarsdóttir (HK)
5-6. Sæti - Fjóla Rut Svavarsdóttir og Guðrún Kristín Einarsdóttir (Þrótti)
5-6. Sæti - Kolbrún Júlía Erlendsdóttir og Lilja Margtét (HK)
7-9. Sæti - Jóhanna Jakobsdóttir og Svala Guðmundsdóttir (Afturelding)
7-9. Sæti - Guðrún Margrét Jónsdóttir og Auður Anna Jónsdóttir (KA)
7-9. Sæti - Berglind Gígja Jónsdóttir og Særún Erla Baldursdóttir

Sætaskipan í karlaflokki varð eftirfarandi:

1. Sæti - Einar Sigurðsson og Brynjar Pétursson (HK)
2. Sæti - Karl Sigurðsson og Emil Gunnarsson (HK)
3. Sæti - Eiríkur R Eiríksson og Arnar Halldórsson (Stjarnan)
4. Sæti - Ingólfur Guðjónsson og Ólafur J Júlíusson (HK)
5-6. Sæti - Reynir Árnason og Valgeir Valgeirsson (HK)
5-6. Sæti - Jón H Haraldsson og Haukur Garðarsson (Afturelding)
7. Sæti - Alexander Sævar Guðbjörnsson og Hafþór Breki Bergsson (Stjarnan)

Fyrir fyrsta sæti í kvenna keppninni fengust 9 stig fyrir fyrsta sæti, 8 fyrir annað og svo koll af kolli. Í karlaflokki fengust 8 stig fyrir fyrsta sætið, 7 fyrir annað og svo framvegis.

Stigakeppni unglinga
Í stigakeppni unglinga til Íslandsmeistara er staðan því þannig eftir fyrsta mót:
Birta 6 stig, María 6 stig, Fjóla 5 stig, Guðrún Kristín 5 stig, Guðrún Margrét 3 stig, Auður 3 stig, Berglind 3 stig og Særún 3 stig.

Drengjamegin er staðan þessi:
Ingólfur 5 stig, Ólafur 5 stig, Reynir 4 stig, Valgeir 4 stig, Alexander 2 stig og Hafþór 2 stig.

Næsta mót
Næsta mót verður haldið á Flúðum þann 27. júní og verður það skemmtimót spilað í 3ja manna liðum, en næsta stigamót verður haldið á Þingeyri þann 4. júlí.

Á efri myndinni eru frá vinstri: Þórey, Heiða, Laufey, Lilja, Inga Lilly og Dögg.
Á þeirri neðri eru frá vinstri: Kalli, Emil, Einar, Brynjar, Eiríkur og Arnar ásamt dóttur sinni.

Frábær þátttaka á fyrsta stgamóti sumarsins

12.06.2009
Frábær þátttaka er á fyrsta stigamóti sumarsins, en 7 karlalið og 9 kvennalið skráðu sig til leiks.

Hér má sjá uppröðun fyrstu leikja. (ath að lekir geta hafist á undan skráðum tíma, ef leikurinn á undan er stuttur).

Spilað verður eftir svokölluðu "Tvöföldu útsláttarkerfi" sem virkar þannig að öll lið eiga tryggða tvo leiki. Ef lið tapar leik þá á það samt möguleika á að spila til úrslita. Við annað tap liðs dettur það úr keppni.

Miðað við þennan fjölda má búast við því að úrslitaleikur karla verði spilaður um kl 16.00, en úrslit kvenna um kl 18.00.

Mikilvægt er að öll lið séu tímanlega á staðnum og séu heit þegar kemur að þeirra leik, því engin tími fæst í upphitun á sandinum sjálfum. Athugið að leikjum getur verið flýtt um nokkrar mínútur ef leikurinn á undan er stuttur.

Íslandsmeistari unglinga - Nýjung

10.06.2009
Í sumar verður í fyrsta sinn keppni milli leikmanna 21 árs og yngri um titilinn Íslandsmeistari unglinga 2009.

Keppnin fer þannig fram að á stigamótum sumarsins sem og Íslandsmótinu í ágúst, fá allir leikmenn stig eftir því hvar þeir lenda í hverju móti fyrir sig.

Þessi stig safnast saman eftir hvert mót og í lok sumars er einhver einstaklingur, eða einstaklingar hæstir að stigum. Sá einstaklingur sem verður hæstur verður krýndur Íslandsmeistari unglinga 2009.

Að sjálfsögðu verður krýndur bæði Íslandsmeistari karla og kvenna.

Nú er um að gera fyrir ykkur sem eigið möguleika á þessum titli að vera með á sem flestum mótum til að eiga möguleika.

Fyrsta mótið sem gefur stig er núna á laugardaginn. Ertu búin að skrá þig ?

Strandblakmót á laugardaginn

09.06.2009
Laugardaginn 13. júní verður fyrsta mót sumarsins sem gefur stig til stigameistara ársins 2009.

Keppt verður í 2ja manna liðum eftir strandblakreglum.

Mikill áhugi er fyrir þessu móti og miðað við aðsóknina á vellina undanfarið má búast við fjölda liða. Ef svo fer að skráning verður mjög mikil, gæti þurft að lengja mótið fram á sunnudag, en það kemur allt í ljós síðar.

Vinsamlegast skráið liðin ykkar inn sem fyrst svo auðveldara verði að gera tímaáætlun fyrir mótið.

Skráningu lýkur föstudaginn 12. júní kl 20.00.

Skráning fer fram hér

Þátttökugjald er 3.000 kr pr/lið og greiðist það á staðnum fyrir fyrsta leik.

Uppröðun leikja má svo sjá hér á þessari síðu seinna á föstudagskvöldið.

Dagur 5 á Kýpur - Blað brotið í sögu strandblaks karla á Íslandi

04.06.2009
Ísland - Andorra (kvk)
Stelpurnar okkar áttu bæði góðan dag og góðan reynsludag. Þær byrjuðu á því að spila við lið Andorra kl 10.15 í morgun.

Eftir leik gærdagsins var farið í naflaskoðun til að sjá hvað mætti bæta. Þær stimpluðu það vel inn hvað mætti laga og ákváðu að einbeita sér að þeim atriðum í leiknum.

Þær byrjuðu leikinn mjög vel og voru með yfirhöndina allan tímann. Andorra kom engum vörnum við góðum uppgjöfum, flottum sóknum og skipulögðum leik stúlknanna. Svo fór að lokum að Ísland vann leikinn 2-0 og hrinurnar 21-11 og 21-12. Mjög vel spilaður leikur og flott að sjá hvernig þær nýttu sér það sem um var talað fyrir leik.

Ísland - Liechtenstein (kvk)
Stelpurnar voru í þvílíku fanta stuði þegar þær mættu Liechtenstein í dag. Þetta var leikur um að komast í fjögurra liða úrslit. Lilja fór á kostum í uppgjöfum og átti líklega um 10 ása í fyrstu hrinu. Hún fékk 4 ása úr fyrstu 5 uppgjöfunum og komu mótherjarnir engum vörnum við.

Ísland gjörsamlega mokaði sandi yfir mótherjana og sigruðu þær hrinuna 21-8, eitthvað sem sést sjaldan í strandblaki.

Lilja og Laufey virtust ekki hafa misst taktinn í annarri hrinu og byrjuðu hana mjög vel, voru yfir alla hrinuna eða þar til staðan var 19-13 fyrir Ísland.

Þá gerðist eitthvað sem engin skilur...
Liechtenstein fengu þá 3 stig í röð og staðan orðin 19-16. Ísland fékk þá 1 stig og sendiréttinn og staðan því 20-16 eða bara eitt stig í fjögurra liða úrslitin.

Þessi staða er bara þannig að það á ekki að vera hægt að tapa, og það vita allir blakarar... en það er nákvæmlega það sem er svo hættulegt, að vita að það á ekki að vera hægt að tapa í þessari stöðu, og þá sérstaklega í strandblaki þar sem allar aðstæður geta spilað inní eins og vindur, sandur og annað.
Þótt ótrúlegt megi virðast þá náðu mótherjarnir að jafna leikinn, og vinna hrinuna 22-20.

Þarna virtist helst sem reynsluleysi hafi valdið því að þær töpuðu hrinunni, en þær nýttu meðal annars ekki leikhléið sem þeir áttu fyrr en í stöðunni 20-20 þegar allt var komið í óefni.

Úrslitahrinan var nánast einstefna því mótherjarnir höfðu tvíeflst við sigurinn í annarri hrinu. Þær sigruðu úrslitahrinuna 15-9, og þar með leikinn 2-1.

Ótrúlega svekkjandi niðurstaða en samt staðreynd.
Dýrmæt reynsla sem fór í bankann hjá þeim Lilju og Laufeyju sem þær hafa væntanlega með sér í komandi mót, bæði heima og heiman.

Stelpurnar enduðu því í 5. sæti á mótinu en miðað við hvernig þær léku gegn Kýpur, sem er eitt sterkasta liðið á leikunum, þá ættum við með réttu að vera meðal 3ja efstu þjóðanna. En því miður varð ekki svo í þetta skiptið.

Við getum verið stolt af stelpunum okkar sem spiluðu mjög svo vel á þessu móti og voru stígandi með hverjum leik. Ef við höfum færi á að fara erlendis og spila við þessar aðstæður nokkur skipti, þó ekki væri nema viku fyrir svona mót, þá erum við til alls líkleg.

Frábært hjá ykkur stelpur!

Ísland - Malta (kk)
Dagurinn í dag komst í sögubækurnar fyrir íslenskt strandblak karla. Karlaliðið okkar spilaði úrslitaleik um 7. sætið í keppninni og er skemmst frá því að segja að þeir unnu ekki eingöngu sína fyrstu hrinu í landsleik, heldur unnu þeir sinn fyrsta landsleik og það 2-0.

Þeir Einar og Brynjar komu vel undirbúnir til leiks og voru staðráðnir í því að gera betur en áður.
Einar er búin að kenna sér meins í baki undanfarna daga og má þar meðal annars kenna um slæmum rúmum sem hótelið býður uppá, en ekki síður því álagi sem fylgir að spila þessa erfiðu en skemmtilegu íþrótt.
Eftir baknudd og góða upphitun var hann tilbúinn í leikinn.

Liðin voru mjög jöfn og jafnt á öllum tölum. Strákarnir okkar höfðu þó alltaf frumkvæðið í fyrri hrinunni, voru einu til tveim stigum á undan og endaði hrinan með okkar sigri 21-18.

Seinni hrinan fór af stað svipað og sú fyrri og leiddu strákarnir hrinuna allt fram að síðustu stigunum, en þá komust Maltverjar upp fyrir okkar menn og leiddu síðustu stigin.
Þeir Einar og Brynjar voru þó ekki á því að gefast upp og héldu í Maltverja, voru aldrei lengra en stigi frá þeim, komust svo yfir 20-19. Eftir þetta skiptust liðin á að vera með forskot er fór svo að lokum að Ísland vann hrinuna 24-22, og þar með leikinn 2-0.

Frábærlega vel spilaður leikur hjá okkar mönnum, móttakan var mjög góð, sem og uppspil og sóknir.

Strandblakíþróttin er spiluð þannig á svona mótum að liðin taka yfirleitt annan leikmanninn fyrir hjá hinu liðinu og gefa upp á sama leikmanninn allt mótið, og það gera öll liðin. Í þessu móti var Einar fórnarlambið og tók hann á móti 90% af öllum uppgjöfum sem liðið fékk á sig. Brynjar var þá mest í hlutverki uppspilara og fórst það vel úr hendi.

Strákarnir okkar geta verið sáttir við mótið í heild, þó svo þeir hefðu að sjálfsögðu viljað komast lengra. En miðað við hin liðin þá stöndum við okkur bærilega, og ættum með réttu að vera að berjast um 5. sætið.

Ef og þegar strandblakið á Íslandi hefur fengið hús til að æfa í og keppa, þá verðum við fljót að ná upp í þann standard að sigra hvaða lið sem er af þessum þjóðum... það kemur vonandi fljótlega að því.

Dagur 4 á Kýpur - Þrír leikir í dag

03.06.2009
Ísland - Andorra (kk)
Leikurinn við Andorra hófst kl 10:15 og áttu strákarnir okkar mjög góða byrjun og virtust koma vel undir búnir gegn mjög svo sterku liði Andorra. Frábærar varnir og flottar sóknir sáust og voru liðin samstíga fyrstu stigin. Þá datt Andorra í gírinn og spiluðu gjörsamlega óaðfinnanlegan leik. Hver einasti bolti lenti á línunni og flugu Andorra menn framúr jafnt og þétt. Leikurinn endaði með sigri Andorra 2-0 eða 21-13 / 21-10.

Ísland - Monaco (kk)
Monaco liðið er samsett af ungum strákum sem eru mjög svo vel spilandi, snöggir og liprir. Annar þeirra er atvinnumaður hjá Nice í Frakklandi og hinn er strandblakari. Landsliðið okkar náði að halda út fyrri hlutann í báðum hrinum en misstu svo flugið. Einhver þreyta virtist vera í okkar mönnum síðan um morguninn og sást það best að þeir virtust ekki vera að spila sinn rétta leik, og bara úr fókus.
Leikurinn endaði með sigri Monaco 2-0 eða 21-11 / 21-12.

Strákarnir okkar eiga einn leik eftir á mótinu og er það leikurinn um 7. sætið gegn Möltu í fyrrmálið kl 10.30.

Ísland - Luxemborg (kvk)
Stelpurnar okkar voru mjög vel stemdar fyrir leikinn og ætluðu að þjarma ærlega að Luxemborg sem eru núverandi smáþjóðameistarar. Eitthvað virtust þær samt ekki hafa stillt strengina alveg rétt því samskiptaleysi og fát varð til þess að Lux náði strax forustunni og hélt henni til loka hrinunnar. Stelpurnar okkar náðu þó að klóra í bakkann og söxuðu vel á forskotið og fengu 15 stig í þeirri hrinu.

Stelpurnar okkar komu öllu ákveðnari inní aðra hrinuna. Þær höfðu frumkvæðið mest alla tímann. Um miðbik hrinunnar náðu Luxarar að saxa á forskotið og var jafnt í öllum tölum uppí 17. Þá gerðu stelpurnar nokkur mistök í staðsetningum og vörn sem varð til þess að Lux náðu að síga framúr og vinna leikinn 2-0. Hrinurnar fóru 21-15 / 21-20 fyrir Lux.

Í heildina var leikurinn mjög góður hjá okkar stelpum og greinilegt að þær eru bara á uppleið, og verður gaman að sjá hvað þær gera gegn Andorra kl 10.15 í fyrramálið. Þær eiga einnig leik kl 16.00 við Liechtenstein og er það leikur sem við eigum möguleika á að vinna. (krossum fingur :-)

Dagur 3 á Kýpur - Fyrsti landsleikurinn

02.06.2009
Ísland - Monaco (kvk)
Dagurinn í dag var sérstakur fyrir þær Laufey og Lilju en þær eru nýliðar í landsliðinu í strandblaki og voru að spila sinn fyrsta landsleik í þeirri íþrótt. Þær spiluðu sinn fyrsta leik á móti Monaco, en það lið spilaði til úrslita á síðustu smjáþjóðaleikum.

Ekki voru þær alveg lausar við stressið, sem er kannski skiljanlegt því þær voru að fara í sinn fyrsta landsleik, í íþrótt sem æfð er 3 mánuði á ári heima á fróni.

Stelpurnar spiluðu bara nokkuð vel en það helsta sem hrjáði þær í leiknum voru einmitt taugarnar. Þegar taugarnar bila, þá eiga grunn atriðin oft til með að gleymast og það var það sem gerðist. Monaco stjórnaði ferðinni algjörlega og gleymdu stelpurnar okkar staðsetningum, fóru ekki í hávörn og bökkuðu ekki nógu langt frá neti til að verjast sóknum sem ekki voru blokkaðar. Mistök sem koma sjaldan fyrir ef leikmenn eru yfirvegaðir.

Fyrir þá sem ekki vita þá er þjálfara ekki heimilt að vera með innáköll og leiðbeina leikmönnum í strandblaki, þannig að þegar leikmenn byrja að klikka, þá þurfa þeir sjálfir að peppa hvorn annan til að komast í gegnum þrautirnar, en það er eitt af því sem vantaði í leik liðsins, var að þær segðu hver annari meira til.

Stelpurnar náðu þó að halda út fyrripartinn í báðum hrinunum og sýndu það að þær eiga alveg heima hér á meðal þeirra bestu á smáþjóðaleikum. Ísland tapaði þessum leik 2 - 0 eða 21-16 / 21-14.

Eftir leikinn var Lilja svo dregin út í lyfjatest ásamt annari Monaco stúlkunni. Lilja hafði orð á því að þegar einhverstaðar er tekið lyfjapróf, og þótt sé dregið um hver eigi að fara, þá lendi hún nánast alltaf í þeim prófunum.

Ísland - Liechtenstein (kk)
Strákarnir okkar, þeir Einar og Brynjar, áttu sinn fyrsta leik í mótinu við lið Liecthenstein (Lie), en Lie spiluðu einnig til úrslita á mótinu fyrir tveim árum í Monaco.

Leikurinn var mjög jafn og spennandi allan tímann, þar sem liðin skiptust á föstum og góðum sóknum, sem og frábærum varnarleik. Brynjar átti góðar blokkir beint í sand og Einar hamraði tuðruna eins og hann kann best. Ekki dugði þó að spila sinn besta leik til að vinna þetta sterka lið og fór svo að Ísland tapaði leiknum 2 - 0 með skorinu 21 - 17 / 21 - 18.

Strákarnir voru mjög ánægðir með sinn leik þótt þeir hafi þurft að "lúta í sand" í dag og hlakka mikið til morgundagsins, en þá eiga þeir tvo leiki, annan við Andorra kl 10.15 en hinn við Monaco kl 17.15 (Kýpverskir tímar +3).

Greinilegt er að Einar og Brynjar eru komnir í sitt gamla góða strandblakform og verða væntanlega erfiðir á mótum sumarsins.

Ísland - Kýpur (kvk)
Kvennalandsliðið okkar átti tvo leiki í dag, en sá seinni var við sterkt lið Kýpverja, en Kýpverjur unnu lið Andorra í morgun 21-5 og 21-8.

Stelpurnar voru ákveðnar að taka þennan leik föstum tökum, áttu mjög fína upphitun og voru til í slaginn, enda var tíminn frá síðasta leik notaður til að byggja sig upp aftur, bæði af orku og svo jákvæðum hugsunum.

Það var greinilegt að þær voru mjög vel undirbúnar því þær héldu vel í Kýpverjurnar allan leikinn, og misstu þær aldrei of langt frammúr sér. Stressið fór greinilega mest allt í fyrri leikinn og spiluðu þær eins og ætlast var til af þeim, börðust allan tímann, settu boltann í auðu svæðin og stóðu sig mjög vel.
Leikurinn endaði þó með sigri Kýpur stúlkna 21 - 14 og 21 - 18 eða 2-0.

Stelpurnar voru mjög ánægðar með sinn leik og fengu lof frá áhorfendum, en stór hluti af íslenskum keppendum í öðrum greinum sem keppt er í hér í Limasol fjölmenntu á leikinn og studdu stelpurnar. Takk fyrir það.

Á morgun eiga stúlkurnar svo bara einn leik og er hann kl 17.15 við Luxemborg, en þær eru meistarar frá síðustu leikum.

Á efri myndinni má sjá Lilju í hörku baráttu, en á þeirri neðri er Brynjar í upphitun.

Dagur 2 á Kýpur - Hitinn á uppleið

01.06.2009
Í dag tóku strákarnir og stelpurnar okkar æfingu um hádegisbilið í steikjandi hita, en mælar sýndu tæpar 40°c við strandblakvellina. Ekki var það til að kæla sandinn og héldu iljarnar áfram að brenna frá því í gær. Þetta lagaðist þó aðeins þegar við fengum vatnsslöngu til að vökva völlinn og kæla, og dugði það í einhverjar mínútur.

Hitinn var nánast óbærilegur og hafði Laufey á orði að hún ætti á tímabili erfitt með andardrátt, en það lagaðist þegar leið á æfinguna. Lilju virtist aftur á móti betur henta þetta hitastig og var hún hin sprækasta.

Um kl 19.00 fóru liðin svo í klukkustunda rútuferð til Nicosíu til að taka þátt í opnunarhátíðinni, en það er venjan að íþróttamenn geri það þó svo það dragi úr þeirri hvíld sem íþróttamennirnir þurfa í undirbúningi fyrir átökin.

Hátíðin var frekar látlaus en stemningin í íslenska hópnum var frábær, og skemmtu þau sér hið besta, enda var þetta eina stundin sem við komum til með að hitta hina íþróttamennina frá Íslandi, sökum vegalengdar milli borga.

Bæði strandblakliðin eiga leik á morgun. Kvennaliðið á tvo leiki og er sá fyrri kl 10.15 við Monaco en sá síðari kl 18.30 við gestgjafana Kýpur. Strákarnir eiga aftur á móti leik þegar sólin er í grillstuði og spila kl 11.30 við Liechtenstein.

Nú er bara spurning hvort æfingarnar í hitanum síðustu tvo daga hafi náð að venja liðin okkar við þær erfiðu aðstæður sem hér eru, steikjandi hitann og brennandi sandinn.

Á meðfylgjandi mynd má sjá þjálfara Monaco standa á handklæði í sandinum, en þó þeir séu vanari hita en liðin okkar þá gat hann engan vegin staðið í sandinum meðan hann gaf upp á liðið sitt. Þið getið rétt ímyndað ykkur hvernig okkur íslendingunum líður sem æfum við 5° heitan sand.

Dagur 1 á Kýpur - Fótabruni og hveitihlaup

31.05.2009
Strandblaklandsliðin tóku fyrstu æfinguna á völlunum í dag. Æfingatíminn var ekki sá besti, eða kl 14.00 á heitasta tíma. Þetta er þó kannski besti tíminn til þess að klára sjokkið sem fylgir því að prufa andstæðar aðstæður við það sem liðið hefur æft við undanfarin mánuð, en hitinn í dag var um 35°c.

Sandurinn á völlunum hér sem er sér innfluttur frá Egyptalandi, hvítur og léttur eins og hveiti, var svo heitur að til að byrja með var ekki hægt að ganga á honum. Hópurinn þurfti að stinga fótunum niður í sandinn til að finna smá kælingu því yfirborð sandsins var líklega um 60°c heitt. þetta var svona eins og að reyna að spila strandblak á glóðum, nánast ógerlegt. Óspart var notað aftersun til kælingar undir yljar fram eftir degi.

Eftir 45 mín æfingu var ákveðið að komið væri gott, enda liðin búin að taka vel á því í bræðandi hitanum og glóandi sandi.

Önnur æfing var tekin um kl 19.00 en þá voru aðstæður allt aðrar. Hitastigið á sandinum fínt og tilfinningin öll önnur.

Strákarnir tóku léttan æfingaleik við Monaoo meðan stelpurnar tóku spretti, smöss og móttökur á vellinum við hliðina.
Allir voru sammála því að þessi æfing hefði verið fín og gaf hópnum aukið sjálfstraust, og allt annað en sjokkið eftir fyrri æfinguna.

Dagurinn í heild var mjög góður, hótelið þokkalegt fyrir utan það að reykingar eru leyfðar í andyrinu/salnum við móttökuna og maður því alltaf reyktur bæði út og inn. Maturinn er aftur mjög fínn, allavega svona á fyrsta degi.

Á efri myndinni má sjá Brynjar og Einar eftir góða æfingu, en á þeirri neðri þær Lilja og Laufey, en þeim finnst ekkert leiðinlegt að hafa tekið þá ákvörðun að velja strandblakslandsliðið í stað inniblaks.

Á morgun verður tekin ein æfing og svo hvíld fyrir átökin sem hefjast á þriðjudag.

Landsliðin í strandblaki til Kýpur á morgun

29.05.2009
Á morgun laugardag halda strandblaklandslið karla og kvenna, ásamt á annað hundrað íslenskra íþróttamanna á Ólympíuleika smáþjóða á Kýpur.

Strandblaklandsliðin verða ásamt hluta af íslenska íþróttahópnum á ströndinni í Limassol meðan aðrir íþróttamenn keppast í Nicosiu.

Strandblaklandsliðin hafa æft mjög vel að undanförnu og eru í toppformi, en sólardagar undanfarnar vikur hafa hitað sandinn örlítið og þannig auðveldað æfingar.

Landslið kvenna að þessu sinni skipa þær Laufey Björk Sigmundsdóttir (HK) og Lilja Jónsdóttir (Þrótti), en þær eru núverandi íslandsmeistarar í greininni.

Landslið karla er líklega reyndasta strandblakpar á Íslandi, en þeir hafa unnið íslandsmeistaratitilinn alls fjórum sinnum á síðustu fimm árum, ásamt því að hafa áður spilað á Ólympíuleikum smáþjóða. Þetta eru þeir Einar Sigurðsson (HK) og Brynjar Pétursson (HK).

Flokkstjóri strandblaksins verður Karl Sigurðsson (HK), en hann keppti einmitt ásamt Brynjari á leikunum í Monaco fyrir tveimur árum.

Hér á síðunni verða sagðar fréttir af ferðinni á hverju kvöldi og úrslit tíunduð.

Skráðu þig á póstlistann til að fá fréttirnar beint í æð.

Við óskum þeim öllum góðs gengis, sem og öllu íþróttafólki frá Íslandi.

Þjálfun í strandblaki

24.05.2009
Í sumar mun verða í boði þjálfun fyrir byrjendur og lengra komna. Einnig fyrir keppnislið sem hafa hug á að ná lengra í íþróttinni og ætla að taka þátt í mótum sumarsins.

Þjálfunin samanstendur af:
- Kennslu í reglum strandblaksins
- Tækni við móttöku og uppspil
- Slagtækni
- Uppgjafir
- Hreyfingar í sandi
- Staðsetningar í leik
- Merkingar milli manna

Meira...

Úrslit fyrsta trimmóts sumarsins

24.05.2009
Það leit ekki út fyrir gott veður samkvæmt veðurspám fyrir fyrsta mót sumarsins, en spáin hljóðaði uppá úrhellis rigningu og blástur.

Þau strandblaklið sem skráðu sig til leiks létu það nú ekki á sig fá og mættu bara í regnslám, með regnhlífarnar með sér til að hlífa sér gegn veðrinu milli leikja.
En það er svo ótrúlegt að þegar strandblakmót eru haldin, þá rætist alltaf úr veðrinu fyrir rest og voru úrslitaleikirnir spilaðir í glampandi sól og blíðu.

7 lið mættu í mótið sem var hið skemmtilegasta. Þarna voru nokkrir trimmarar í bland við landsliðsfólk og skemmtu sér allir vel.
Eingöngu skráði sig eitt karlalið en þeir fengu þá bara undanþágu og spiluðu í kvennadeildinni og fór svo að lokum að þeir sigruðu mótið eftir spennandi leik við landslið kvenna í strandblaki.

Spilað var eftir inniblakreglum og því ekki tekið hart á reglunum og þrír í hverju liði, en þó voru tvö lið sem spiluðu eftir settum strandblakreglum, núverandi- og fyrrverandi landslið og eingöngu 2 í liði. Enn eitt kvennaliðið spilaði eingöngu með tvo leikmenn, þær Ásta og Kolla, og stóðu þær sig alveg glimrandi vel.

Annar af undanúrslitaleikjunum fór fram á milli núverandi og fyrrverandi landsliða í kvennastrandblaki, og fór svo að lokum að núverandi landslið, þær Lilja og Laufey sigruðu þann hörku spennandi leik með tveimur hrinum gegn einni (21-17 / 17-21 / 15-11). Það er því greinilegt að þær eru að verða tilbúnar fyrir næsta landsliðsverkefni, en það er einmitt um næstu helgi þegar liðið fer á Ólympíuleika smáþjóða í Kýpur.

Úrslit mótsins urðu eftirfarandi:
1. sæti - Austri (Jón, Haukur og Steinn)
2. sæti - Lína (Laufey og Lilja)
3. sæti - HK (Heiða og Þórey)

Myndir eru komnar inná myndasíðuna

Strandblakmót laugardaginn 23. maí

19.05.2009
Laugardaginn kemur, þann 23. maí ætla strandblaklandsliðin að halda trimmmót í Fagralundi í Kópavogi.

Keppt verður í 3ja manna liðum karla og kvenna og er skráning þegar hafin, en henni lýkur kl 19.00 föstudaginn 22. maí.

Þátttökugjald í mótinu er 3.000 kr á lið og greiðist það á staðnum.

Mótið er hugsað sem styrktarmót fyrir strandblakliðin en þau eru á leið til Kýpur um mánaðarmótin til að keppa á Ólympíuleikum smáþjóða. Þátttökugjaldinu er stillt í hóf, aðeins 3.000 kr, ekki verður neitað að taka við hærri greiðslu :-)

Mótið hefst stundvíslega kl 10.00 á laugardeginum og verður eitthvað fram eftir degi, en fer að sjálfsögðu eftir fjölda liða.

Smelltu hér til að skrá liðið þitt

Sumarið 2009 er komið !

29.04.2009
Sumarið er komið þó svo veðrið sé ekki alveg á sama máli. Búið er að setja upp netin í Fagralundi en aðeins eftir að fara yfir sandinn, moka hann upp og gera mýkri.

Strandblaklandsliðin eru komin á fullt í æfingar og hafa þau meðal annars fengið að fara inní frjálsíþróttahöllina í Laugardalnum til að hreyfa sig í sandinum þar, því stutt er í Smáþjóðaleikana og því ekki seinna vænna að fara að æfa.

Strandblaknefnd blaksambandsins er á fullu þessa dagana að raða upp mótum sumarsins og verður dagskráin gefin út næstu daga.

Ef einhver lið hafa áhuga á að halda strandblakmót, 2ja, 3ja eða 4ra manna í sumar og auglýsa hér á síðunni, þá vinsamlegast hafið samband við Kalla (S. 693 3009).

Endilega skráið ykkur á póstlistann og fáið fyrstu fréttir af mótum sumarsins.

Koma svo, allir í strandblak :-)

Stigameistarar 2008

17.08.2008
Fyrir Íslandsmótið í gær var Emil Gunnarsson efstur að stigum eftir stigamót sumarsins. Hann var sá eini af keppendum í karlaflokki sem tók þátt í öllum mótum sem í boði voru. Það ásamt því að vera í fyrstu tveimur sætum í öllum mótunum gerði hann að stigameistara í strandblaki karla 2008 með 22 stig.

Í kvennaflokki var öllu meiri spenna en þrjár stúlkur voru efstar og jafnar með 15 stig fyrir mótið, en það voru þær Laufey Björk Sigmundsdóttir, Lilja Jónsdóttir og Karen Björg Gunnarsdóttir, en þær tóku einnig þátt í öllum stigamótum sumarsins.

Það varð því ekki ljóst fyrr en eftir úrslitaleikinn í gær að þær Laufey og Lilja voru efstar og jafnar eftir sumarið, með 25 stig hvor, og eru því stigameistarar í strandblaki kvenna 2008. Strandblak.is óskar þeim öllum innilega til hamingju með titilinn.

Við viljum að sjálfsögðu hvetja sem flesta að taka þátt í öllum þeim mótum sem í boði eru, og því er það ætlun okkar að gera þessum titli hærra undir höfði á næsta tímabili. Einnig höfum við í hyggju að halda fleiri en 3 stigamót á næsta ári með tilkomu fleiri valla.

Úrslit á Íslandsmóti 2008

17.08.2008
Fimmta Íslandsmótið í strandblaki var haldið í gær laugardaginn 16. ágúst í Fagralundi í Kópavogi.
10 kvennalið og 8 karlalið tóku þátt í mótinu sem stóð frá kl 9.00 - 19.00.

Óhætt er að segja að dagurinn hafi í alla staði verið frábær þótt veðrið hafi kannski ekki verið uppá það allra besta, en léttar úrkomur og smá gjóla tóku þátt í mótinu án þess þó að hafa teljandi áhrif á leikina.

Allir þátttakendur fengu boli frá Bros og Strandblak.is, orkudrykki frá Ölgerðinni og vatnsbrúsa frá Símanum.
Vinningar á mótinu voru ekki af verri endanum en má þar telja upp gasgrill, úttektir í sportvöruverslun, gjafakort í bíó, bensínúttektir, gsm síma og fleira.

Happdrætti var fyrir alla keppendur, en dregið var úr nöfnun þeirra keppenda sem voru á staðnum þegar úrslitaleikurinn fór fram. Lilja Margrét vann dagboka frá 66°North, Óli J og Laufey unnu sitthvort 5.000 króna bensínkortið frá Skeljungi og Brynjar vann gsm síma og frelsiskort frá Símanum. Við óskum þeim til hamingju með vinningana.

Nýir íslandsmeistarar urðu í karlaflokki þar sem Einar Sigurðsson var fjarri góðu gamni, en hann er fjórfaldur íslandsmeistari ásamt Brynjari Péturssyni.

Röð efstu liða á mótinu í gær urðu eftirfarandi í karlaflokki:
1. sæti og Íslandsmeistarar 2008 Brynjar Pétursson HK og Michael Overhage Þrótti
2. sæti Emil Gunnarsson Stjörnunni og Karl Sigurðsson HK
3. sæti Ólafur J Júlíusson HK og Ingólfur Guðjónsson HK.

Á myndinni eru frá vinstri:
Karl, Emil, Michael, Brynjar, Ólafur og Ingólfur.

Mynd. Álfheiður

Í kvennaflokki voru einnig krýndir nýir íslandsmeistarar þar sem Þórey Haraldsdóttir var einnig fjarri góðu gamni, en hún er tvöfaldur íslandsmeistari og bronsverðlaunahafi frá Monaco 2007 ásamt Heiðbjörtu Gylfadóttur.

Röð efstu liða urðu því eftirfarandi í kvennaflokki:
1. sæti og Íslandsmeistarar 2008 Laufey Björk Sigmundsdóttir HK og Lilja Jónsdóttir Þrótti
2. sæti Heiðbjört Gylfadóttir HK og Karen Björg Gunnarsdóttir HK
3. sæti Ingibjörg Gunnarsdóttir HK og Martyna Mielke HK.

Á myndinni eru frá vinstri:
Heiðbjört, Karen, Laufey, Lilja, Ingibjörg og Martyna.



Mynd. Álfheiður

Mótið þótti takast vel og eru aðstandendur Strandblak.is, sem sáu um framkvæmd mótsins, mjög ánægðir með þau jákvæðu viðbrögð sem þeir fengu frá keppendum í mótslok.

Mörg fyrirtæki gerðu okkur kleift að halda svo veglegt mót með góðum vinningum og viljum við þakka eftirfarandi fyrirækjum veittan stuðning: Olís, Bros, Útilíf, Ölgerðinni, Símanum, Skeljungi, Sambíóunum, 66°North, Ístak og Toyota.

Þó nokkrir einstaklingar tóku myndir meðan á mótinu stóð og óskar Strandblak.is eftir myndum til að setja á síðuna, vinsamlegast sendið okkur póst á netfangið strandblak(hjá)strandblak.is.

Strandblak.is þakkar öllum keppendum fyrir skemmtilegan dag og óskar nýjum íslandsmeisturum til hamingju með titilinn.

Íslandsmótið - uppsetning og upplýsingar

15.08.2008 kl 20.37
Nú er búið að setja upp mótið fyrir morgundaginn.
Eins og áður hefur komið fram eru 8 karlalið og 10 kvennalið. Þetta er aldeilis glæsilegur fjöldi af kvennaliðum, sérstaklega þegar litið er til þeirrar staðreyndar að U-19 landsliðhópur kvenna er með æfingahelgi nú um helgina. Enn einu sinni hitta æfingar hjá þeim á sömu helgi og strandblakmótin, en þær hafa af þeim sökum ekki getað tekið þátt í neinu af mótum sumarsins.

Það er greinilegt að þetta mót verður hörku spennandi, og þá sérstaklega í kvennaflokki þar sem 3 stúlkur eru jafnar og efstar í stigakeppni sumarsins með 15 stig hver. Þær eru Laufey Björk Sigmundsdóttir, Karen Björg Gunnarsdóttir og Lilja Jónsdóttir. Mótið á morgun sker því úr um stigameistaran í kvennaflokki.

Í karlaflokki trónir á toppnum Emil Gunnarsson með 15 stig, en næsti maður er með 8. Því þarf eitthvað mikið að gerast ef Emil á ekki að vinna stigameistaratitilinn 2008.

Þau stig sem keppendur hafa eftir stigamót sumarsins gagnast þeim þegar raðað er í mótið, þannig að efstu liðin raðast á móti neðstu liðunum.
Efstu þrjú lið í hvorum flokki eru eftirfarandi:

Hér er tímasetning fyrstu leikja. ATH að leikir geta verið skemmri en tímasetning segir og því mikilvægt að vera á staðnum tímanlega, því næsti leikur hefst strax og fyrri leik er lokið.

Spilað verður eftir tvöföldu útsláttarkerfi og fá því öll lið tvo möguleika á að komast í úrslitaleikinn. ATH að það lið sem tapar leik, sér um að rita leikinn á eftir.
Dómgæsla er í höndum liðanna sjálfra, en ef óskað er dómara þá er það möguleiki.

Veitingasala verður á staðnum og þar verða seldar samlokur, drykkir, ávextir o.fl.

Að sjálfsögðu verða einhverjir leikir þar sem áhorfendur geta unnið sér inn verðlaun. Einnig verður happdrætti meðal keppenda, en eingöngu verður dregið úr nöfnum þeirra keppenda sem eru á staðnum þegar happdrættið er.
Bæði happdrættið og leikir verða fyrir og eftir úrslitaleiki.

Þá er ekkert eftir annað en að hvetja alla til að taka með sér útilegustólana eða teppi til að sitja á og svo fullt af góðu skapi eins og alvöru strandblakarar :-)

Magnað mót framundan - Síðasti skráningardagur í dag !

14.08.2008 kl 24.00
Besta skráning á Íslandsmóti til þessa, 10 kvennalið og 8 karlalið skráðu sig til keppni.
Niðurröðun leikja kemur hér á síðuna á morgun, föstudag.

14.08.2008 kl 20:20
FRÁBÆR SKRÁNING !!!
Liðum fjölgar ört, en síðast þegar skráning var athuguðu þá voru 9 kvennalið og 8 karlalið búin að skrá sig í mótið :-)

14.08.2008 kl 18:00
Nú þegar þetta er skrifað eru 7 kvennalið og 5 karlalið búin að skrá sig til leiks í Íslandsmótið sem verður á laugardaginn.
Vinningar á mótinu eru þeir bestu sem sést hafa og ótal fyrirtæki sem hafa komið að til að styrkja okkur í þessari frábæru íþrótt.

Einhver misskilningur er í gangi með að aðeins þeir sem hafa tekið þátt í stigamótum megi taka þátt, en svo er alls ekki, heldur eru allir velkomnir.

Leikið verður eingöngu á laugardeginum og hefst fyrst leikur stundvíslega kl 9:30.
Búningsklefar verða opnir kl 9.00.

Það kemur svo í ljós eftir kvöldið í kvöld hve mörg lið skrá sig. Leikjaniðurröðun verður sett á vefinn á morgun föstudag.

Fyrir þá sem hafa áhyggjur af veðrinu, þá er alltaf sól og blíða í Fagralundi

Skráning hafin í Íslandsmótið

11.08.2008
Skráning er nú hafin í Íslandsmótið í strandblaki 2008 og verður mótið haldið þann 16. ágúst í Fagralundi í Kópavogi.

Miðað við þann fjölda sem stundað hefur vellina undanfarna daga þá má búast við mjög mikilli þátttöku, og gæti því farið að einhverjir leikir þurfi að spilast á sunnudegi líka.

ATH að skráningu lýkur fimmtudaginn 14. ágúst kl 24.00.
Keppt er í tveggja manna liðum og er þátttökugjald 4.000 kr pr/lið og greiðist gjaldið á staðnum fyrir fyrsta leik.
Ætlast er til að báðir leikmenn liðs spili í eins búningum.

Nánari upplýsingar koma síðar í vikunni.

Skráið ykkur hér

Allir í sumarfríi og fellur því mótið niður

25.07.2008
Það er greinilegt að allir strandblakarar eru á víð og dreif um landið, því eingöngu voru 2 lið sem skráðu sig í mótið sem átti að vera á morgun.

Næsta skráða mót er því Íslandsmótið í ágúst, en þó er líklegt að einhverju móti verði skotið inn með skömmum fyrirvara. Við bendum öllum því á að skrá sig á póstlistann til að fá nýjustu upplýsingar.

Skráning hafin í sumarmót Strandblak.is

21.07.2008 (kl 11.00)
Fyrirspurn kom á strandblak.is hvort það megi skrá 2ja manna lið í þetta mót.
Það er ekkert því til fyrirstöðu að 2ja manna lið skrái sig, ef þau vilja t.d. æfa sig fyrir Íslandsmótið sem verður í ágúst. Gjaldið er þó hið sama eða 3.000 kr á lið.

21.07.2008
Þann 26. júlí (næsta laugardag) heldur Strandblak.is Sumarmót í keppni í 3ja manna liðum.

Veður hefur verið frábært undanfarið, og þó svo það rigni aðeins núna í vikunni, þá verður komið skínandi gott veður á laugardag.

Við viljum endilega sjá sem allra flest lið og hafa gaman.

King/Queen móti frestað !

18.07.2008
Mótinu sem átti að vera núna um helgina hefur verið frestað.

Mikil og góð svörun var við póstinum sem var sendur út og lýstu margir yfir því hve hugmyndin væri góð að halda mót sem þetta, en afboðuðu sig í leiðinni vegna annara verka, sumarfrísferða eða annað.

Vegna þessa áhuga hefur Strandblak.is ákveðið að þetta mót verði, en dagsetning hefur ekki verið ákveðin. Upplýsingar um dagsetningu verða senda til allra sem eru á póstlistanum, og einnig settar hér inná vefinn.

Við hvetjum bara alla sem hafa áhuga á að spila á morgun til að mæta uppí Grafarvog í fyrramálið og spila svona leiki, rótera með spilafélaga og hafa gaman. Allavega lítur veðurspáin þannig út að allir ættu að geta skemmt sér saman :-)

Kveðja og takk fyrir góða svörun,
Strandblak.is

Nýjar myndir

13.7.2008
Nýjar myndir eru komnar inná myndasíðuna. Myndirnar eru meðal annars frá Jónsmessumótinu sem haldið var þann 21. júní '08. Einnig eru þarna myndir af stigamótinu á Þingeyri sem haldið var þann 5. júlí en þær myndir koma frá Lilju Jónsdóttur og Unni Bryndísi Guðmundsdóttur.

Ef þið eigið myndir sem við megum nota á vefinn, þá endilega sendið okkur á netfangið strandblak(hjá)strandblak.is

Úrslit frá Akureyri

12.7.2008
Annað stigamót BLÍ fór fram á Akureyri í dag. Strákarnir spiluðu fyrir hádegi í blíðskapar veðri, en þegar stúlkurnar byrjuðu leikinn eftir hádegið fór að rigna. Lygnt var þó í allan daginn þannig að veðrið hafði ekki mikil áhrif á mótið.

Fjögur karlalið og fjögur kvennalið tóku þátt í mótinu og fóru leikar eftirfarandi.

Karlar sæti og stig fyrir mótið

1. Brynjar Pétursson (8 stig) og Matthías Haraldsson (8 stig)
2. Emil Gunnarsson (7 stig) og Birgir Már Vigfússon (7 stig)
3. Ólafur Arason (6 stig) og Ólafur J Júlíusson (6 stig)
4. Valgeir Valgeirsson (5 stig) og Reynir Árnason (5 stig)

Kvennaflokkur sæti og stig

1. Laufey Björk Sigmundsdóttir (8 stig) og Lilja Jónsdóttir (8 stig)
2. Karen Björg Gunnarsdóttir (7 stig) og Birna Baldursdóttir (7 stig)
3. Unnur Bryndís Guðmundsdóttir (6 stig) og Kolbrún Björg Jónsdóttir (6 stig)
4. Lilja Margrét (5 stig) og Olga Kolbrún (5 stig)

Eftir mótið eru Laufey, Lilja og Karen allar jafnar í fyrsta sæti í stigakeppninni með 15 stig. Emil er á toppnum í karlaflokki með 15 stig en næstu menn eingöngu með 8 stig.

Fín þátttaka á Akureyri

11.7.2008
Nú er skráningu lokið fyrir mótið á Akureyri og er þátttakan á mótinu mun betri en á síðasta ári.

Alls hafa 4 karla- og 5 kvennalið skráð sig til keppni.

Mótið hefst kl 10.00 í fyrramálið.

Annað stigamót BLÍ haldið á Akureyri næstu helgi

8.7.2008
Næstu helgi eða þann 12. júlí verður annað stigamót BLÍ haldið á strandblakvellinum á Akureyri. Mótið er í höndum KA manna. Keppt er í tveggja manna liðum með strandblakreglum líkt og mótið á Þingeyri.

Skráning er hafin hér á síðunni en henni lýkur föstudaginn 11. júlí kl 19.00

Þátttöku gjald er 3.000 kr pr/lið eins og verið hefur á mótum fram að þessu og greiðist það á staðnum fyrir fyrsta leik.

Nánari lýsing á mótinu kemur á vefinn þegar nær dregur.

Úrslit af fyrsta stigamóti ársins á Þingeyri

8.7.2008
Þann 5. júlí síðastliðinn var fyrsta stigamót ársins haldið á Þingeyri í blíðskaparveðri, eins og von og vísa er af þeim bænum.

Sex kvennalið og tvö karlalið mættu til leiks. Spilað var í einum riðli kvenna þar sem öll liðin kepptu innbyrðis.

Úrslitin urðu eftirfarandi í kvennaliðum ásamt stigum sem hver einstaklingur náði í stigakeppninni:

1. Heiðbjört Gylfadóttir (8 stig) og Karen Björg Gunnarsdóttir (8 stig)
2. Laufey Björk Sigmundsdóttir (7 stig) og Lilja Jónsdóttir (7 stig)
3. Ásthildur Gunnarsdóttir (6 stig) og Unnur Bryndís Guðmundsdóttir (6 stig)
4. Fjóla Rut Svavarsdóttir (5 stig) og Guðrún Kristín Einarsdóttir (5 stig)
5. Eyrún Harpa Hlynsdóttir (4 stig) og Guðrún Snæbjörg Sigþórsdóttir (4 stig)
6. Ásta Gylfadóttir (3 stig) og Hulda Ólafsdóttir (3 stig)

Úrslitin í karlaflokki urðu eftirfarandi ásamt stigum einstaklinga í stigakeppninni:

1. Emil Gunnarsson (8 stig) og Þórir Steinarsson (8 stig)
2. Ellert Örn Erlingsson (7 stig) og Pálmi Pétursson (7 stig)

Myndir verða settar á vefinn síðar.

Strandblakmótið á Hefst kl 10.00 á morgun 5. júlí

4.7.2008
Strandblakmótið á Þingeyri hefst kl 10.00 á morgun. Veðurspáin er stranblökurum í hag, hlýtt, hálfskýjað og næstum logn.

Skáningu er lokið í mótið, en þeir sem vilja melda sig með á síðustu stundu hafi samband við Laufey Sigmunds í síma 861 1366

Grein um strandblak í fréttablaðinu í dag

1.7.2008
Í fréttablaðinu í dag birtist smá grein um strandblak, en þar er tekið viðtal við Brynjar Pétursson margfaldan íslandsmeistara og landsliðsmann í strandblaki. Kíkið á það hér Fréttablaðið

Fyrsta stigamót sumarsins um helgina.

30.6.2008
Næsta laugardag þann 5. júlí verður fyrsta stigamót sumarsins í strandblaki. Mótið verður haldið á bestu völlum landsins á Þingeyri við Dýrafjörð.

Undanfarin tvö ár hefur hluti Íslandsmótsins verið haldin á Þingeyri og hefur þátttaka ávalt verið mjög góð á þeim fallega stað. Samkvæmt vitneskju Strandblaks.is þá er áhugi fyrir þessu móti enn meiri í sumar en áður, og því von á mikilli þátttöku.

Þetta er tveggja manna mót, spilað eftir strandblakreglum og er þátttökugjaldið 3.000 kr.

ATH að í sumar verður fingurslag leyft en það þarf að vera mjög hreint (miðað við bolti snúist ekki meir en 1 hring)

Skráning í mótið er hafin.

Jónsmessumótið var frábært

24.6.2008
Jónsmessumótið sem haldið var síðastliðin laugardag (21.6) gekk vel í aldeilis frábæru veðri.

Mótið hófst kl 10.00 í alveg brakandi blíðu, blanka logni og öskrandi sól, og því algjört snilldar blakveður. Því miður er ekki enn búið að tyrfa við vellina í Fagralundi þannig að sóldýrkendur þurftu að snúa baki í vellina til að sóla sig að framan, en það stendur víst til bóta.

Yfir 40 þátttakendur kepptu á mótinu í 12 liðum. Eingöngu var eitt karlalið sem keppti á mótinu en það voru 3 flokks drengir úr Stjörnunni og stóðu þeir sig vel.

Keppt var tveimur riðlum þar sem allir kepptu við alla, síðan var spilaður kross milli tveggja efstu liða í báðum riðlum sem endaði svo á úrslitaleikjum um 1 - 4 sæti.

Í A-riðli voru liðin "Vinir Lubbu" og "Táslurnar" í efstu tveim sætunum, en í B-riðli var Threesome í 1. sæti en hörku spennandi keppni um annað sætið þar sem 3 lið voru jöfn að stigum. Þurfti því að reikna út hlutfall stigaskors til að sjá hvaða lið kæmist í krossinn. Það fór svo að liðið "Blond Ambition" var í öðru sæti og spilaði í krossinum.

Krossinn fór þannig að í öðrum leiknum sigruðu Vinir Lubbu liðið Blond Ambition og í hinum undanúrslitaleiknum sigruðu Threesome liðið Táslurnar. Það voru því Vinir Lubbu og Threesome sem spiluðu til úrslita, en Táslurnar og Blond Ambition spiluðu um 3. sætið.

Leikar fóru þannig að í 1. sæti urðu Vinir Lubbu, 2. sæti urðu Threesome og í 3. sæti Táslurnar

Strandblak.is þakkar öllum þátttakendum fyrir skemmtilega og jákvæða spilamennsku.

Myndir verða settar inn fljótlega.

Skráningu lokið og frábær þátttaka

21.6.2008
Nú er skráningu lokið í Jónsmessumótið og er þátttakan mjög góð, eða 36 þátttakendur í 12 liðum.
Öll þessi 12 lið keppa í kvennariðlum þar sem eingöngu eitt karlalið skráði sig til keppni, en það lið eru lærisveinar Emils í Stjörnunni.

Fyrsti leikur mótsins hefst kl 10.00 og því ætlast til að keppendur mæti ekki seinna en 9.40 svo fyrstu liðin séu tilbúin í leik á réttum tíma.

Keppt verður í tveim 6 liða riðlum og fær því hvert lið allavega 5 leiki. Keppt verður á tíma og verður hver leikur 15 mínútur og vinnur það lið sem hefur fleiri stig eftir þann tíma.
Fjögur efstu liðin í hvorum riðli fara svo í krossspil og er endað á úrslitaleik um fyrstu 3 sætin. Mótinu ætti því að ljúka um kl 15.00.

ATH að keppt er á nýju völlunum í Fagralundi í Kópavogi.
Sjá kort

Strandblakmót næsta laugardag !

15.6.2008
Laugardaginn 21. júní ætlar Strandblak.is að halda Jónsmessu-skemmtimót.
Keppt verður í 3ja manna liðum. Gaman væri ef liðin gætu fundið uppá frumlegum nöfnum, og eins að hvert lið hefði sinn búning.

Skráning er byrjuð hér.

Smelltu hér til að sjá nánar um mótið.

Nýjar myndir

15.6.2008
Myndir frá mótinu sem haldið var við Gufunesbæ þann 1. júní eru komnar inn. Skelltu þér á myndasíðuna til að skoða.

Fyrsta mót sumarsins !

1.6.2008
Þá er fyrsta móti sumarsins lokið í aldeilis "brjálæðis blíðu" eða 30 metrum á sekúndu. Það er ótrúlegt hvað hægt er að spila strandblak í miklum vindi.

Óhætt er að segja að allir hafi skemmt sér konunglega í dag, og þá ekki bara við að spila blak, heldur líka að reyna að hitta boltann áður en vindurinn tæki hann, einnig vakti það kátínu að sjá bolta lenda inná velli sem stefndi í upphafi í allt aðra átt, þannig vindur að ekki var einu sinni hægt að reikna hann almennilega út.

9 kvennalið og 4 karlalið mættu til leiks og var spilað frá kl 10.00 - 15.00. Deginum lauk svo með því að keppendum var boðið uppá grillaðar pilsur.

Myndir koma á vefinn fljótlega, póstur verður sendur á þá sem eru á póstlistanum þegar myndirnar koma inn.

Hér má sjá úrslit mótsins

Strandblak.is þakkar fyrir jákvæð viðbrögð, skemmitlegan dag og góða þátttöku.

31.5.2008
Nú er skráningu lokið í fyrsta mót sumarsins og er þátttakan mjög góð, en 36 einstaklingar taka þátt í mótinu, í 8 kvennaliðum og 4 karlaliðum.

Mótið hefst stundvíslega kl 10.00 og eru liðin beðin um að mæta ekki seinna en 15 mín fyrir 10 svo tímaáætlun standist. ATH að greiðsla þátttökugjalda (3.000 kr pr/lið) fer fram fyrir mót.

Keppt verður í einum riðli í karlaflokki en spiluð tvöföld umferð og fær því hvert lið 6 leiki.
Í kvennaflokki verður spiluð ein umferð í tveim fjögurra liða riðlum. 2 efstu liðin úr hvorum riðli fara síðan saman í riðil og 2 neðstu liðin saman í einn riðil. Hvert lið ætti að fá út úr þessu 6 leiki.

Leikið verður á tíma og er hver leikur 20 mínútur. Skipt er áfram um völl í hverjum 7 stigum til að jafna leik gagnvart veðri og vindum.

Það skal tekið fram að mótið er á strandblakvöllunum í Grafarvogi

29.5.2008
Nú þegar þetta er skrifað er komin fín skráning bæði í karla og kvennalið og lítur því út fyrir skemmtilegt mót.
Skráningu í mótið lýkur laugardaginn 31. maí kl 19:00

26.5.2008
Nú er búið að setja inn upplýsingar um fyrsta mót sumarsins, en það verður haldið núna á sunnudaginn kemur, þann 1. júní.

Farðu inná síðuna með mótunum til að fá nánari upplýsingar eða beint á skráningarformið.

Vellirnir í Fagralundi tilbúnir

26.5.2008
Í dag var klárað að setja upp vellina í Fagralundi eftir að þeir voru færðir. Eingöngu á eftir að þökuleggja í kring og þá er allt klappað og klárt.

Kíktu inná síðuna um völlinn í Fagralundi til að sjá hvar hann er staðsettur.

Flutningur á völlum í Fagralundi

8.5.2008
Þar sem nýtt íþróttahús á að rísa í Fagralundi þá þarf að færa strandblakvellina. Þeir eru þó ekki fluttir langa leið, eða aðeins 100 m nær Reykjavík.

Strandblakvellirnir í Kópavogi opna því vonandi í næstu viku.

Smelltu á myndina og sjáðu hvar vellirnir eru núna.

Strandblak á Íslandi komið í fréttirnar í Danmörku

4.4.2008

Þann 1. apríl kom grein á netmiðlinum www.Volleynet.dk um það að árið 2009 ætlaði FIVB að halda mót í strandblaki bæði á Íslandi og í Grænlandi, og átti þetta að vera gerlegt vegna hitabreytinga í heiminum undanfarin ár.
Þessi grein var aprílgabb hjá einum greinarhöfundi netmiðilsins og því ekkert til í fréttinni.

Strandblak.is hafði samband við greinarhöfund sem hafði greinilega ekki hugmynd um að strandblak væri stundað á Íslandi, og varð hann hissa þegar hann komst að því hvað við erum komin langt. Hann tók við okkur viðtal og setti inn nýja grein inná netmiðilinn. Greinina má lesa hér http://www.volleynet.dk/nyheder.php?id2=9040

Fullt af nýjum myndum komnar inn

26.8.2007
Búið er að setja inn fullt af nýjum myndum inná myndasafnið. Myndir frá smáþjóðaleikunum í Monaco, Landsmóti UMFÍ og svo Íslandsmótinu 2007

Farið á myndasíðuna og sjáið allar nýjustu myndirnar.

Ef þið eigið einhverjar skemmtilegar myndir, endilega sendið þær til okkar og við bætum þeim í safnið

Frábær skráning á Íslandsmótið

17.8.2007
Nú er skráningu lokið fyrir Íslandsmótið og er greinilegt að þetta verður spennandi mót, en 9 kvennalið og 8 karlalið skráðu sig til keppni.

Búið er að setja upp mótið og vegna fjölda liða verður keppt eftir svokölluðu "tvöföldu útsláttarkerfi", því sama og er notað á öllum stærstu mótum erlendis, svo sem Swatch túrnum í Evrópu og Avp túrnum í Ameríku.

Keppendur í kvennamótinu eiga að mæta í síðasta lagi kl 8:30 til að ganga frá gjaldi áður en mót hefst og karlmennirnir kl 9:00 í síðasta lagi.

Úrslitaleikir mótsins eru settir á kl 17:00 og er mótið væntanlega búið kl 17:45

Hér að neðan gefur að líta tímasetningar á fyrstu leikjum mótsins: Ath síðast breytt kl 16:48

Verðlaun og happdrætti á Íslandsmóti

16.8.2007
Nú þegar þetta er skrifað eru 7 kvennalið og 6 karlalið búin að skrá sig til leiks, en skráningu lýkur í kvöld.

Verðlaunin eru ekki að verri endanum en fyrir utan veglega bikara og medalíur má nefna stór ferðagasgrill frá Olís, Nokia gsm síma frá Hátækni, líkamsræktarkort frá ISF, gjafavöru frá Bros og bón og þvott fyrir bílinn.

Happdrættið verður þannig að dregið verður úr nöfnum þeirra þátttakenda sem verða á staðnum þegar úrslitaleikirnir fara fram, en dregið verður í leikhléi síðasta leiks dagsins.

Nú er um að gera að skrá sig fyrir miðnætti í kvöld til að eiga möguleika á þessum frábæru verðlaunum.

Íslandsmótið í strandblaki verður þann 18. ágúst

10.8.2007
Búist er við metþátttöku á Íslandsmótinu, sem verður haldið í Fagralundi í Kópavogi og er skráning þegar hafin. Til þess að skrá lið til þátttöku þarf að senda póst á strandblak@strandblak.is og taka fram full nöfn þeirra leikmanna sem skipa liðið.

ATH að síðasti skráningardagur er fimmtudagurinn 16. ágúst, svo hægt sé að raða niður mótinu og gefa út leiktímana kvöldið fyrir mót.

Öll lið skulu skipuð 2 leikmönnum (engir varamenn) og er ætlast til að leikmenn í sama liði spili í eins búningum. Ekki eru gerðar aðrar kröfur til búninga.

Þátttökugjaldið eru 4.000 kr á lið og greiðist það á staðnum hálftíma áður en mótið hefst.

Glæsileg verðlaun verða í boði eins og á síðustu mótum en einnig verður happdrætti þar sem dregið verður úr nöfnum þátttakenda.

Ekki má gleyma því að veitt verða verðlaun í stigakeppninni eins og í fyrra en þau hljóta þeir leikmenn sem fá flest samanlögð stig úr mótum sumarsins.

Vodafone og Vífilfell bjóða á strandblakmót !

24.7.2007
Næsta laugardag þann 28. júlí ætla Vodafone og Vífilfell að standa fyrir strandblakmóti í Fagralundi á strandblakvöllum HK í Kópavogi.

Vodafone sér um fjörið og Vífilfell um drykkina. DJ verður á staðnum og heldur uppi rífandi strandblakstemningu með þátttakendum.

Keppt verður í 4 manna liðum og er hver leikur 15 mínútur. Fengin verða úrslit og verðlaun veitt. Öllum heimil þátttaka.

Mótið verður frá kl 13 - 18 og er skráning í fullum gangi á vefsíðu Vodafone www.vodafone.is/strandblak.
Sjá auglýsingu frá Vodafone Strandblakmót Vodafone.pdf

Úrslit stigamótsins á Akureyri

23.7.2007
2. Stigamót BLÍ í Strandblaki var haldið laugardaginn 21. júlí á Akureyri. 6 karlalið mættu til keppni og urðu úrslit eftirfarandi:
1. sæti Davíð og Hilmar
2. sæti Jói Stef og Óli A
3. sæti Hjörtur og Hannes

Eingöngu mætti eitt kvennalið og spiluðu þær í riðli með strákunum, og gáfu þeim víst ekkert eftir.
Í fyrsta sæti í kvennakeppninni urðu því þær Ásthildur og Ella. Þær eru því komnar með 8 stig hvor og þegar búnar að vinna sér inn rétt til að taka þátt í Íslandsmótinu, án þess að fara í forkeppni, sem verður þann 18. ágúst í Kópavogi.

Ef einhver lumar á myndum af mótinu á akureyri þá væru þær vel þegnar :-)

Stigamót á Akureyri 21. júlí

13.7.2007
Næsta stigamót BLÍ verður laugardaginn 21. júlí á Akureyri, og hefst það kl 9.00.
Þátttökugjaldið 3.000 kr á lið, og greiðist það á staðnum fyrir mót.

Skráning fer fram með því að senda tölvupóst á netfangið strandblak@strandblak.is
Síðasti skráningardagur er fimmtudagurinn 19. júlí.

Úrslit Landsmótsins og myndir

11.7.2007
Á dögunum var í fyrsta skiptið keppt í strandblaki á Landsmóti, og miðað við þátttöku þá ætti það að vera fastur punktur í Landsmótum hér eftir.

Mótið hófst á karlakeppninni kl 10.00 og voru allir leikir spilaðir á 2 völlum. Svo fór að 4 lið skildu hin að og spiluðu þau innbyrðis um að komast í úrslitaleikinn. Þessi 4 lið voru Einar og Brynjar, Róbert og Jói, Viggi og Geir, Emil og Kalli.

Róbert og Jói sigruðu Emil og Kalla um að komast í úrslitaleikinn, og Einar og Brynjar sigruðu þá Vigni og Geir.
Um 1. sæti spiluðu því þeir Einar og Brynjar á móti Róbert og Jóa. Emil og Kalli spiluðu við Vigga og Geir um 3. sætið.

Úrslitaleikurinn var leikinn kl 17.00 samkv. áætlun og urðu úrslitin eftirfarandi:

1. sæti Einar og Brynjar
2. sæti Róbert og Jói
3. sæti Emil og Kalli

Kvennamótið byrjaði kl 13.30 og voru 6 lið skráð til keppni. Eitt lið afboðaði sig þó á síðustu stundu og var mótinu því breytt þannig að öll liðin spiluðu innbyrðis.

Þó nokkur munur var á styrkleika liðanna og varð mesta keppnin um 3. sætið þar sem hreinn úrslitaleikur var á milli Birtu og Theo og Heidí og Írisar. Hann fór á þann veg að Birta og Theo sigruðu með mikilli baráttu.

Úrslitin í kvennakeppninni urðu þannig:

1. sæti Heiða og Þórey
2. sæti Karen og Lilja Jóns
3. sæti Birta og Theo

Mótstjóri þakkar öllum keppendum fyrir þátttökuna og jákvætt viðmót. Einnig þakkar hann öllum þeim sem komu að mótinu á einn eða annan hátt.

Myndir verða settar inn mjög fljótlega.

Niðurröðun í riðla og leikjaplan

7.7.2007 - kl 00:12
Nú er búið að raða niður í mótið og setja inn tímasetningar á leikjum.
Athugið að tímasetningar gætu breyst yfir daginn þar sem skipulagið er frekar þétt, og eru keppendur beðnir um að fylgjast vel með.

Til að sjá tímaplanið þarftu að sækja þessa skrá sem er á pdf formi.

Nidurrodun_leikja.pdf

Skemmtimót á Jónsmessu

20.6.2007
Laugardaginn 23. júní ætlar Strandblak.is að halda skemmtimót í strandblaki í Fagralundi í Kópavogi.

Mótið er svokallað Jónsmessu-trimmmót og hefst það því kl 18:00 og verður spilað fram eftir kvöldi.
4 spila saman í liði og verður keppt bæði í kvenna og karlaflokki. Leyfilegt er að koma með blandað lið en þá keppir það lið í karlaflokki.

Tilraun verður gerð með að hafa forgjafakerfi á mótinu sem virkar þannig: Spilað er uppí 21 og þarf að vinna með 2 stigum. Ef það er 1 leikmaður í liði sem spilar blak í meistaraflokki, þá fær hitt liðið 5 stig í forgjöf Ef 2 leikmenn í liði spila í meistaraflokki, þá fær hitt liðið 9 stig í forgjöf Ef 3 leikmenn í liði spila í meistaraflokki, þá fær hitt liðið 12 stig í forgjöf Ef 4 leikmenn í liði spila í meistaraflokki, þá fær hitt liðið 14 stig í forgjöf Ath ef um blandað lið er að ræða gildir þetta ekki yfir kvennleikmenn, þar sem spilað er í karladeild. Þetta ætti því að jafna aðeins stöðu sumra liða.

Skráning fer fram í gegnum tölvupóst á netfangið strandblak@strandblak.is eða í síma 693 3009 (Kalli)
Skráningu lýkur kl 12:00 á hádegi á laugardag svo hægt sé að setja upp leikjaplanið.
Þátttökugjaldið er 1.000 kr á mann, og greiðist það í upphafi móts.

Skráning hafin í Landsmótið

14.6.2007
Nú er í fyrsta skiptið keppt í strandblaki á Landsmóti ungmennafélaganna sem fram fer í Kópavogi dagana 5. - 8. júlí og hófst skráning í mótið í vikunni.
Öllum er leyfileg þátttaka og þarf ekki að vera bundin félagi til að geta keppt. Það er því um að gera fyrir alla sem vilja vera með að skrá sig.
Hægt er skrá sig á síðu Landsmótsins http://landsmot.kopavogur.is

Leiga á strandblakvöllum

12.6.2007
Nú er hægt að leigja vellina í Fagralundi. Smelltu á "Vellir" til að sjá nánari upplýsingar.

Standblakmót um helgina

25.5.2007
Strandblakmót verður á sunnudaginn (og mánudaginn ef skráning er mikil)

Strandblak.is heldur strandblakmót á sunnudaginn fyrir stráka og stelpur og hefst það kl 10:30.
Þetta er æfingamót fyrir strandblaklandsliðin og því væri gaman að fá sem sterkustu andstæðingana.

Þátttökugjald er 2.000 kr á lið og greiðist á staðnum.
Skráning er fer eingöngu fram með því að senda póst á strandblak@strandblak.is og lýkur henni kl 19:00 á laugardag- gefið upp nöfn beggja þátttakenda.
Áætlað er að byrja mótið kl 10:30 á sunnudagsmorgun og verður búið að setja inn leikskipulag hér á síðuna fyrir miðnætti á laugardag.

Sendið okkur póst á strandblak@strandblak.is fyrir nánari upplýsingar, eða hringið í Kalla í síma 693 3009.