Dags: 23.08.2011

Nýr kafli í sögu strandblaks á Íslandi

Um liðna helgi fóru unglingalandslið kvenna U19 til Drammen í Noregi til að taka þátt í fyrsta norðurlandamóti (NEVZA) sem haldið hefur verið í strandblaki unglinga.
Mætt til leiks voru lið frá Svíþjóð, Noregi og Íslandi og fengu Íslendingar mikið lof fyrir að mæta með lið á mótið, en stærri strandblakþjóðir eins og Danmörk og Finnland sendu ekki keppendur að þessu sinni.

10 lið tóku þátt í mótinu í kvennaflokki, 4 frá Svíþjóð, 4 frá Noregi og svo 2 frá Íslandi.

Íslensku liðin skipuðu stúlkur sem hafa verið mikið í sandinum undanfarin ár og náð langt hér innanlands í greininni, verið duglegar að taka þátt í fullorðinsflokkum sem og unglingaflokkum, og því voru þær valdar í þetta verkefni.

Öll liðin frá Noregi og Svíþjóð æfa strandblak allt árið þar sem þau hafa hús með strandblakvöllum til að æfa í á veturna. Liðunum okkar gekk því ágætlega á mótinu miðað við þann tíma sem við getum verið í sandinum, eða þessa 3 mánuði á ári. Það má því segja að það sé sama uppá teningnum þegar unglingalið eru send út, eins og þegar keppt er í A-landsliðum, að leikmenn hafa getu til að ná mun lengra, og jafnvel sigra svona mót, ef eingöngu þeir hefðu betri aðstöðu (innivelli).

Mótið var spilað á tveimur völlum í úthverfi Drammen í Noregi, en úrslitaleikirnir síðan spilaðir á velli sem búið var að setja upp í miðbæ Drammen. Íslensku liðin komust því miður ekki í úrslitaleikina þrátt fyrir fína leiki.

Lið 2 hjá Íslandi skipuðu þær Berglind Gígja Jónsdóttir (HK) og Elísabet Einarsdóttir (HK), en lið 1 hjá Íslandi skipuðu þær Helena Kristín Gunnarsdóttir (Þróttur Nes) og Hjördís Eiríksdóttir (Stjarnan). Þjálfari var Karl Sigurðsson og fararstjóri Ásta Sigrún Gylfadóttir.

Leikir íslensku liðanna fóru þannig:

• Ísl 2 / Nor 1 = 0-2 (12-21 / 17-21)
• Ísl 2 / Nor 4 = 0-2 (7-21 / 14-21)
• Ísl 2 / Sví 2 = 1-2 (21-19 / 23-25 / 12-15) Fyrsta hrina unnin í unglingalandsleik
• Ísl 2 / Sví 3 = 0-2 (22-24 / 18-21)
• Ísl 2 / Sví 4 = 0-2 (15-21 / 19-21) leikur um 7. sæti
• ------------------------------------------
• Ísl 1 / Nor 2 = 0-2 (19-21 / 14-21)
• Ísl 1 / Nor 3 = 0-2 (10-21 / 11-21)
• Ísl 1 / Sví 1 = 0-2 (4-21 / 11-21)
• Ísl 1 / Sví 4 = 2-1 (25-23 / 15-21 / 15-5) Fyrsti sigur í unglingalandsleik
• Ísl 1 / Sví 2 = 2-0 (21-16 / 21-19) leikur um 5. sæti

Bæði liðin stóðu sig vel á mótinu. Þær Helena og Hjördís enduðu því í 5. sæti mótsins, en þær Berglind og Elísabet í því 8. - Flottur árangur hjá fyrsta unglingalandsliði Íslands í strandblaki.

Það er greinilegt að íslendingar eru ekki langt undan hinum þjóðunum í þessari íþrótt og áttu bæði liðin heima á þessu móti. Það er því ekki spuring að Ísland á að taka þátt í þessu móti á komandi árum.

Myndir frá mótinu má finna hér.

Frá vinstri: Berglind, Elísabet, Hjördís og Helena